មិនសូវខ្លាំងគណិត-រូប កាំង ហួរ តស៊ូបានចូលតិចណូ រៀនដល់បារាំង បានធ្វើការនៅជប៉ុនទៀត

2019-07-04 00:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារស្រលាញ់ការសរសេរកម្មវិធី កាំង ហួរ បានសម្រេចសិក្សាផ្នែកព័ត៌មានវិទ្យា នៅដេប៉ាតឺម៉ង់ ទេពកោសល្យ ព័ត៌មានវិទ្យា និងទំនាក់ទំនង (DICE) នៅវិទ្យាស្ថានបច្ចេកវិទ្យាកម្ពុជា (ITC)។ ក្រោយបានចូលសិក្សានៅ ITC ថ្នាក់មូលដ្ឋានពីរឆ្នាំ យុវជនដឹងថា ខ្លួនជាសិស្សខ្សោយគណិតវិទ្យា និងរូបវិទ្យា ប៉ុន្តែសំណាងល្អ រៀនមិនដែលធ្លាក់។ ចូលឆ្នាំទី៣, ៤ និង ៥ យុវជន ចូលចាប់ជំនាញ។ កំឡុងពេលសិក្សាជំនាញ អ្នកភ្នំពេញរូបនេះ បានក្លាយខ្ញួនពីសិស្សខ្សោយមកជាសិស្សគ្រាន់បើ ហើយទទួលបានអាហារូបករណ៍ សិស្សឆ្នើម SUMITOMO របស់ជប៉ុននៅឆ្នាំ ២០១២។

កាំង ហួរ

ក្រោយបញ្ចប់ការសិក្សាថ្នាក់វិស្វករនៅ ITC កាំង ហួរ បានទទួលអាហារូបករណ៍តាមរយៈ ITC និងស្ថានទូតបារាំងក្នុងឆ្នាំ ២០១៤ ទៅបន្តការសិក្សាផ្នែក **“បញ្ញាសិប្បនិម្មិត និងវិបសាយ ឬ Artificial Intelligent and the Web"** នៅសាកលវិទ្យាល័យ Joseph Fourier ប្រទេសបារាំងរយៈពេលជិតមួយឆ្នាំ ពោលអំឡុងឆ្នាំ ២០១៣-២០១៤។

កាំង ហួរ បានទៅធ្វើការនៅជប៉ុនក្នុងឆ្នាំ ២០១៨ រហូតបច្ចុប្បន្ន។ ការបានទៅសិក្សានៅប្រទេសមហាអំណាចសេដ្ឋកិច្ចមួយនៅអាស៊ីមួយនេះ គឺក្នុងកំឡុងពេលធ្វើការក្នុងវិស័យស្រាវជ្រាវ និងវិស័យអប់រំនៅក្នុងវិទ្យាស្ថាន។

ដំបូងឡើយយុវជនវ័យ២៨ឆ្នាំ កូនអ្នកលក់គ្រឿងសម្អាង ធ្វើការនៅវិទ្យាស្ថានបច្ចេកវិទ្យាកម្ពុជា (ITC) ជាអ្នកស្រាវជ្រាវ លើដំណើរការភាសាក្នុងប្រព័ន្ធកុំព្យូទ័រ (NLP - Natural Language Processing) និងជាគ្រូបង្រៀន ផ្នែកព័ត៌មានវិទ្យា។ អំឡុងឆ្នាំ ២០១៧-២០១៨ ហួរ ក៏ជាគ្រូបង្រៀនក្រៅម៉ោង នៅវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) ផងដែរ។

ក្រោយមកយុវជនច្បងក្នុងចំណោមបងប្អូន៣នាក់ ក៏ទទួលបានឱកាសធ្វើកម្មសិក្សានៅប្រទេសជប៉ុន ផ្នែក NLP រយៈពេល១ឆ្នាំ។ កម្មសិក្សានេះ ក្រោមកិច្ចសហប្រតិបត្តិការ រវាង ស្ថាប័ននៅជប៉ុន (NICT) និង NIPTICT ដែលមានការបញ្ជូនអ្នកស្រាវជ្រាវទៅធ្វើកម្មសិក្សានៅជប៉ុន។

កាំង ហួរ

ក្រោយបញ្ចប់កម្មសិក្សានៅជប៉ុន ហួរ ក៏ទទួលបានឱកាសថ្មីមួយទៀត គឺធ្វើការជាអ្នកស្រាវជ្រាវបច្ចេកទេស នៅស្ថាប័នជប៉ុននេះតែម្តង។ ប៉ុន្តែលោកបានត្រលប់ទៅ NIPTICT មុនមកធ្វើការនៅជប៉ុននៅឆ្នាំ២០១៨ រហូតមកទល់ពេលនេះ។

អ្វីដែលធ្វើអោយ កាំង ហួរ ប្រែប្រួលពីសិស្សមិនសូវពូកែ មកជារៀនពូកែវិញ? កាំង ហួរ បញ្ជាក់ខ្លីថា៖“ពេលដែលយើងចូលចិត្តអ្វីមួយ យើងនឹងខំប្រឹងធ្វើវា ហើយជម្នះរហូតបានសម្រេចគោលដៅ”។

តើស្ថាប័នរដ្ឋជប៉ុនមួយនេះ ផ្ដល់លក្ខខណ្ឌការងារយ៉ាងដូចម្ដេច? ចំពោះកន្លែងធ្វើការ កាំង ហួរ ទទួលបានលក្ខខណ្ឌការងារមានលក្ខណៈស្តង់ដា (ជប៉ុន) និងមានផាសុខភាព ហើយនៅទីនោះប្រជុំដោយអ្នកស្រាវជ្រាវមានបទពិសោធន៍។ កាំង ហួរ តែងតែទទួលបានចំណេះដឹងថ្មីៗ រាល់ពេលពិភាក្សា ឬ សួរទៅកាន់ពួកគេ។

ពេលសួរចំណាប់អារម្មណ៍ លើជំនាញផ្នែកព័ត៌មានវិទ្យា យុវជនវ័យក្មេងប្រាប់ថា បច្ចុប្បន្ន ព័ត៌មានវិទ្យាជាជំនាញសំខាន់បំផុត ព្រោះស្ទើរតែគ្រប់វិស័យ ប្រើប្រាស់បច្ចេកវិទ្យាព័ត៌មានវិទ្យា ដើម្បីសម្រួលដល់ការងារ និង ដោះស្រាយបញ្ហាជាច្រើន។ មូលហេតុដែលគួរជ្រើសរៀនផ្នែកព័ត៌មានវិទ្យាមានច្រើន តែលោកលើកតែ ២ ចំណុចសំខាន់ៗប៉ុណ្ណោះ។

ទីផ្សារការងារ

ដោយសារទំហំនៃការប្រើប្រាស់បច្ចេកវិទ្យាព័ត៌មានធំទូលាយ ស្វែងរកការងារគឺងាយស្រួល បើទោះនៅក្នុងស្រុក ឬ ក្រៅស្រុកក៏ដោយ។ ចំពោះប្រាក់ខែ យុវជនរូបនេះជឿថា បច្ចុប្បន្ន មិនចាញ់អ្នកធ្វើការងារផ្នែកដទៃឡើយ។

ការវិវឌ្ឍនៃបច្ចេកវិទ្យាព័ត៌មាន

ចំពោះអ្នកដែលចូលចិត្តការបង្កើតថ្មី រៀន ឬ ធ្វើការងារ ផ្នែកនេះជាចំណុចចាប់ផ្ដើមល្អបំផុត ព្រោះទំហំដែលបច្ចេកវិទ្យាព័ត៌មានអាចវិវឌ្ឍបាន គឺគ្មានដែនកំណត់ទេ។ មានចំណេះដឹងថ្មីៗជាច្រើន ដែលអ្នកសិក្សាអាចយកមករៀន ហើយ យកមកច្នៃឬ បង្កើតជា អ្វីផ្សេងបាន។ កាំង ហួរ បន្តថា លោករៀននិងធ្វើការងារផ្នែកព័ត៌មានជាង ៧ ឆ្នាំហើយ តែអ្វីដែលលោកចេះ គ្រាន់តែជាផ្នែកមួយតូចមួយតែប៉ុណ្ណោះ។ សព្វថ្ងៃលោកនៅតែរៀនពីបច្ចេកវិទ្យាថ្មីៗ ដើម្បីមានគំនិតថ្មី ទៅធ្វើអ្វីដែលថ្មី។

អតីតសិស្សវិទ្យាល័យវត្តកោះ បានឲ្យដឹងថា រៀនជំនាញព័ត៌មានវិទ្យា មិនតម្រូវឲ្យឆ្លាត ទើបរៀនពូកែឡើយ។ ឲ្យតែខំប្រឹងរៀន នរណាក៏អាចរៀនពូកែដែរ។ ចំណុចដែលយុវជនគិតថាគួរពង្រឹងមាន៣ចំណុចដូចជា៖

រៀនអាន៖ ការអានពិតជាសំខាន់ណាស់សំរាប់វិស័យនេះ ដើម្បីអាចទទួល និង ស្វែងរកព័ត៌មានដោយខ្លួនឯង។ ភាសាអង់គ្លេស ជាអ្វីដែលត្រូវពង្រឹង ព្រោះឯកសារទូទៅសុទ្ធតែភាសាអង់គ្លេស។
រៀនយល់៖ កំឡុងពេលរៀននៅថ្នាក់ជំនាញ ព្យាយាមយល់គ្រប់មុខវិទ្យាតាមដែលអាចធ្វើបាន ព្រោះមុខវិជ្ជាទាំងនេះជាគ្រិះដើម្បីរៀនរបស់ថ្មី។ ព្យាយាមយល់មុខវិជ្ជាដែលពិបាក ព្រោះវាជាការដុះខាត់មួយដែលសំខាន់ ដើម្បីអភិវឌ្ឍសមត្ថភាពនៃការយល់អ្វីដែលពិបាក និង ស្មុគស្មាញ ដែលនឹងអនុញ្ញាតឲ្យយើងរៀន ធ្វើអ្វីផ្សេងទៀតបានលឿន និងល្អជាងមុន។
អនុវត្ត៖ ត្រូវអនុវត្តឲ្យបានច្រើន ព្រោះពេលអនុវត្តទើបយើងអាចយល់បានច្បាស់ និងស៊ីជម្រៅ។

យុវជនវ័យ២៨ឆ្នាំ កាំង ហួរ បន្តថា ទោះរៀន ឬ ធ្វើការងារផ្នែកណាក៏ដោយ គួរជ្រើសធ្វើនូវអ្វីដែលខ្លួនចូលចិត្ត។ ពេលធ្វើអ្វីក៏ដោយ ត្រូវឲ្យតម្លៃនូវអ្វីដែលកំពុងធ្វើ រួចធ្វើឲ្យអស់ពីសមត្ថភាព៕

អត្ថបទផ្សេងទៀត

អត្ថបទ៖ អ៊ុំ សុភក្តិ