តួលេខមិនធ្លាប់មាន Town និង សាន់ដេ អះអាងពីការលក់ដាច់ចម្រៀងចូលឆ្នាំជាង ៣០ ម៉ឺនបន្ទះដូចគ្នា

2015-04-08 20:45:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាតួលេខមិនធ្លាប់មានសម្រាប់ការលក់បទចម្រៀងក្នុងប្រទេស កម្ពុជា ដោយផលិតកម្ម Town និង សាន់ដេ បានអះអាងពីការលក់ដាច់អាល់ប៊ុមចូលឆ្នាំប្រពៃណីជាតិជាង ៣០ ម៉ឺន បន្ទះ ដូចគ្នា។

អ្នកចាត់ការទូទៅប្រចាំផលិតកម្ម Town លោក មាស សុខរតនៈ និយាយថា៖ "តួលេខគិតមកត្រឹមពេលនេះយើងលក់បានជាង ៣០ ម៉ឺនបន្ទះអូន។ នេះយើងរាប់តែការលក់ជា VCD ប៉ុណ្ណោះ ដោយឡែក CD យើងអត់រាប់បញ្ចូលទេ"។

លោក មាស សុខរតនៈ បន្តថា ចំនួនខាងលើធៀបនឹងឆ្នាំ ២០១៤ កន្លងទៅ គឺប្រហាក់ប្រហែលគ្នា តែទោះជាយ៉ាងណាលោកបានអះអាងថា ចំនួនលក់អាចកើនលើសជាងនេះ ព្រោះការបញ្ជាទិញពីទស្សនិកជនកំពុងតែកើនខ្លាំង។

លោក មាស សុខរតនៈ អ្នកចាត់ការទូទៅនៅផលិតកម្ម Town

តួលេខមិនធ្លាប់មាននេះ ត្រូវអ្នកចាត់ការទូទៅដែលជាបងប្រុសតារាចម្រៀងល្បីឈ្មោះ មាស សុខសោភា លើកឡើងថា ដោយសារការសហការគ្នាយ៉ាងល្អក្នុងផលិតកម្មទាំងមូល។ ជាពិសេសការនិពន្ធបទចម្រៀង មេឡូឌីថ្មី ដោយយកគុណភាពជាចម្បង។

យ៉ាងណាក៏ដោយអ្នកចាត់ការទូទៅខាងលើ បានថ្លែងអំណរគុណជាខ្លាំងដល់ទស្សនិកជនជួយគាំទ្រស្នាដៃរបស់ផលិតកម្ម Town នាពេលកន្លងមក។ លោកក៏ស្នើឱ្យទស្សនិកជនជួយគាំទ្រតទៅទៀតដោយផលិតកម្មរបស់លោកនឹងស្វែងរកភាពថ្មី និង ប្លែកៗបន្តទៀត។

ដោយឡែកអ្នកចាត់ការទូទៅវ័យក្មេងរបស់ផលិតកម្ម សាន់ដេលោក ឡាយ សុកចំរើន ប្រាប់ថា គ្រាន់តែ អាល់ប៊ុម រាំក្រឡុក របស់ ខេមរៈ សិរីមន្ត មួយលក់ដាច់ជាង ២០ ម៉ឺនបន្ទះ ហើយអាល់ប៊ុម សុខ ពិសី និង ខាន់ ជេមន៍ រកបានជាង ១០ម៉ឺនបន្ទះ ដោយរាប់ត្រួសៗ។

លោក ឡាយ សុកចំរើន អ្នកចាត់ការទូទៅ សាន់ដេ

អ្នកចាត់ការទូទៅរូបនេះបញ្ជាក់ដូច្នេះ៖"ខ្ញុំមិនទាន់ទទួលបានតួលេខច្បាស់ទេ តែយើងគិតតែ២អាល់ប៊ុមរបស់ សិរីមន្ត វ៉ុល កាឡុក និងអាល់ប៊ុម សុខ ពិសី ហើយ ខាន់ ជេមន៍ ជាង ៣០ ម៉ឺនបន្ទះ បាត់ទៅហើយ។ បើគិតសរុបទាំងអស់ខ្ញុំថាយើងលក់បានមិនក្រោម ៥០ ម៉ឺនបន្ទះទេ"។

លោក ឡាយ សុកចំរើន បន្តថា តាមរយៈការបញ្ជាទិញពីបណ្ដាខេត្តនិមួយៗរាប់ម៉ឺនបន្ទះទៀតលោករំពឹងថាឆ្នាំនេះផលិតកម្មខ្លួននឹងអាចលក់ CD និង VCD ដល់ ៦០ម៉ឺនបន្ទះទៅ ៧០ម៉ឺនបន្ទះ។

ការទទួលបានជោគជ័យដូច្នេះ ដោយសារតែ ផលិតកម្ម សាន់ដេ បានបញ្ចុះតម្លៃ នៃការលក់ចម្រៀង Original ក្នុងមួយបន្ទះត្រឹមតែ ២ ពាន់ រៀលប៉ុណ្ណោះ។ ការទទួលបានជោគជ័យខ្លាំងដូច្នេះក្នុងមានផលិតកម្មសាន់ដេលោក ឡាយ សុកចំរើន អះអាងថា នឹងបន្តស្វែងរកបទចម្រៀងថ្មីៗទៀត ជាពិសេសការនិពន្ធ មេឡូឌី ដោយខ្លួនឯង។

យ៉ាងណាក៏ដោយអ្នកចាត់ការទូទៅខាងលើក៏មិនភ្លេចថ្លែងអំណរគុណដល់បងប្អូនប្រជាពលរដ្ឋខ្មែរជួយគាំទ្រស្នាដៃអាល់ប៊ុមចូលឆ្នាំរបស់ខ្លួនក្នុងឆ្នាំនេះ និង បទចម្រៀងពីមុនៗមកទៀត។

ក្នុងឆ្នាំ ២០១៤ កន្លងទៅ ផលិតកម្ម Town គឺជា អ្នកលក់បំបែកកំណត់ត្រានៃចម្រៀងចូលឆ្នាំប្រពៃណីជាតិរហូតជាង ៣០ ម៉ឺនបន្ទះ។ ដោយឡែកឆ្នាំនេះ ចាំមើលថា Town ឬ សាន់ដេ ជាអ្នកលក់បំបែកកំណត់ត្រាអាល់ប៊ុមចូលឆ្នាំប្រពៃណីជាតិ៕

អានអត្ថបទបន្ត៖ កែវ សីហា រូបរាងប៉ុណ្ណឹង មានអ្នកហ៊ានថាមិនស្អាតទេ?

អានអត្ថបទបន្ត៖ ថតរឿង “Furious 7” ចប់ ខ្ទេចឡានអស់ជាង ២០០

អានអត្ថបទបន្ត៖Mario Maurer ចូលបម្រើទ័ព?

អត្ថបទ៖ អ៊ីង សុឡា