១១១ ឆ្នាំគត់ របាំព្រះរាជទ្រព្យបែបមុខសខ្មែរទៅដល់ប្រទេសបារាំងជាលើកទី២

2018-05-14 07:11:23
ចំនួនមតិ 0 | ចំនួនចែករំលែក 0

ចន្លោះមិនឃើញ

របាំព្រះរាជទ្រព្យ បានទៅទឹកដីប្រទេសបារាំងហើយ ដោយផ្ទាំងទស្សនីយភាពនេះជាការច្នៃសាច់រឿងថ្មីលក្ខណៈខ្មែរទំនើបកម្ម "ព្រះនាងវឌ្ឍនាទេវី " ជាព្រះរាជកិច្ចថ្មីដែលសម្ដេចព្រះរៀម នរោត្តម បុប្ផាទេវី ទ្រង់បង្កើតឡើង និងជាផ្ទាំងទស្សនីភាពដ៏អស្ចារ្យ ។

សម្តេចព្រះរៀមបង្ហាត់បង្ហាញដល់នាដការ មុនចេញទៅសម្តែងនៅប្រទេសបារាំង

បើតាមលោក ព្រឿង ឈាង ជាទីប្រឹក្សាក្រសួងវប្បធម៌ និងវិចិត្រសិល្បៈ និងជាអ្នកចូលរួមក្នុងការងារជាមួយសម្ដេចព្រះរៀមបានឲ្យដឹងថា ផ្ទាំងទស្សនីយភាពល្អឯកនេះនឹងសម្ដែងទៅតាមសាច់រឿងមួយរបស់ប្រទេសក្រិច ប៉ុន្តែក្បាច់និងការស្លៀកពាក់គឺនៅរក្សាបែបរបាំខ្មែរទាំងស្រុង។ លោកបន្តថា ក្រៅពីក៏មានការបន្ថែមនូវក្បាច់រាំបុរាណ ការសម្ដែងនេះគឺផាត់មុខសទាំងអស់ ដើម្បីបង្ហាញពីរបាំព្រះរាជទ្រព្យក្នុងអំឡុង ១០០ឆ្នាំមុន។

ផ្ទាំងទស្សនីយភាពដ៏អស្ចារ្យនៅក្រៅប្រទេសនេះ ប្រមូលផ្តុំដោយនាដកា និងសិល្បករចំណានៗចូលរួមសម្ដែងទាំងអស់ចំនួនជាង៤០នាក់ ។ មុខពេលចេញទៅសម្ដែងនៅបារាំង សម្តេចព្រះរៀម នរោត្តម បុប្ផាទេវី បានដឹកនាំការសម្ដែងថ្វាយព្រះករុណាទតនៅដើមខែឧសភា កន្លងទៅ នៅសាលចតុម្មុខ ។

គិតមកដល់ពេលនេះមានរយៈកាល១១១ឆ្នាំហើយ ដែលរបាំព្រះរាជទ្រព្យបែបមុខសបានយកទៅសម្តែងនៅប្រទេសបារាំង ដោយកាលពីឆ្នាំ១៩០៦ របាំព្រះរាជទ្រព្យបានដង្ហែហ្លួងព្រះសុីសុវតិ្ថមកដល់ទឹកដីប្រទេសបារាំងជាលើកដំបូង៕

អត្ថបទ៖ ដេត ធន្នី