៣ ចំណុចនិយាយពីតិចនិកហ្វឹកហាត់របស់ជម្រើសជាតិម្សិលមិញ

2018-10-05 03:17:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជម្រើសជាតិកម្ពុជា បានប្រមូលផ្ដុំកាលពីល្ងាចម្សិលមិញនេះ ដើម្បីត្រៀមការប្រកួតមិត្តភាពអន្តរជាតិទល់ក្រុមទីម័រខាងកើត នាថ្ងៃទី១២ វេលាម៉ោង ៦:៣០ នាទីល្ងាចនៅពហុកីឡដ្ឋានជាតិ។

ក្នុងការប្រមូលផ្ដុំហ្វឹកហាត់ជាមួយលោក Felix Agustin Gonzalez Dalmas ដៃស្ដាំរបស់ Honda កាលពីល្ងាចម្សិលមិញនេះត្រូវបានគេកត់សម្គាល់៣ចំណុច ដែលពេលនេះ Sabay សូមធ្វើការបង្ហាញជូន៖

១-ចង្វាក់លេង៖ ក្រុមជម្រើសជាតិកម្ពុជាបានធ្វើការហ្វឹកហាត់ជាមួយចង្វាក់លេងខ្លី និងលឿន ដែលទទួលបានការប្រាប់ពីលោក Felix Agustin Gonzalez Dalmas ប្រាប់ទៅកាន់កូនក្រុមក្នុងពេលហ្វឹកហាត់។ ចង្វាក់លងនេះត្រូវបានគេមើលឃើញថា ក្រុមកម្ពុជាបានប្រើក្នុងអំឡុងប្រកួតមិត្តភាពទល់ក្រុមម៉ាឡេស៊ីកាលពីពេលកន្លងទៅ។ ជាមួយគ្នានោះកីឡាករទាំងអស់បានប្រឹងរត់ដេញបាល់ម្ដង២ឬ៣ នាក់នៅពេលបាត់បាល់ ដោយល្បឿនលឿនៗ តាមដែលអាចធ្វើទៅបាន។

២-ចាន់ វឌ្ឍនាកា ៖ សកម្មភាពហ្វឹកហាត់កាលពីម្សិលមិញត្រូវបានគេមើលឃើញថា ចាន់ វឌ្ឍនាកា ត្រូវបានគ្រូបង្វឹកដាក់ឲ្យលេងនៅតំបន់បម្រើ។ តួនាទីនេះគឺដូចទៅនឹងតួនាទីដែល វឌ្ឍនាកា លេងនៅក្លឹប Pahang FA របស់ម៉ាឡេស៊ី។ តំបន់បម្រើដែលគ្រូរៀបឲ្យ វឌ្ឍនាកា លេងនេះគឺខុសពីកន្លែងដែលរូបគេលេងនៅបឹងកេតរាល់ដង ដោយលេងជាខ្សែប្រយុទ្ធ។

ចាន់ វឌ្ឍនាកា (ស្ដាំ)

៣-មានកីឡាករម្នាក់ពាក់អាវកាក់ខុសគេ ក្រោយពេលបែងចែកកីឡាករជាពីរក្រុម៖ ក្នុងក្រុមជម្រើសជាតិកាលពីម្សិលមិញនេះមានកីឡាករតែ ១៧ នាក់ប៉ុណ្ណោះ ដែលបានប្រមូលផ្ដុំ ដោយសារអ្នកខ្លះជាប់ភារកិច្ចជួយក្លឹបរៀងៗខ្លួន។ ក្នុងចំណោម១៧ នាក់ត្រូវបានបែងចែកជាពីរ ដើម្បីចែកក្រុមលេង ប៉ុន្តែដោយសារចំនួនសេសដូច្នេះតម្រូវឲ្យមានម្នាក់ពាក់អាវកាក់ពណ៌ទឹកក្រូចខុសគេ ដើម្បីរៀបចំប្រពន្ធលេងតាមក្បួនគ្រូប្រាប់ ដោយអ្នកដែលមានចំនួនលើសនោះត្រូវប្ដូរជួយក្រុមម្ដងម្នាក់៕