សហព័ន្ធ MMAកម្ពុជាបង្ហាញគោលដៅសំខាន់ចំពោះមុខ
- 2018-10-26 07:35:24
- ចំនួនមតិ 0 | ចំនួនចែករំលែក 0
សហព័ន្ធ MMAកម្ពុជាបង្ហាញគោលដៅសំខាន់ចំពោះមុខ
ចន្លោះមិនឃើញ
កាលពីដើមសប្តាហ៍នេះក្បាច់គុនចម្រុះនៅកម្ពុជាបានបោះជំហានដើរទៅមួយដំណាក់កាលហើយគឺបង្កើតសហព័ន្ធកីឡាយុទ្ធគុនចម្រុះកម្ពុជាជាផ្លូវការដែលទទួលស្គាល់ជាផ្លូវការពីគណៈកម្មាធិការជាតិអូឡាំពិកកម្ពុជា។
មហាសន្និបាតលើកទីមួយត្រូវបានបង្កើតឡើងដើម្បីប្រកាសសុពលភាពសហព័ន្ធ MMA កម្ពុជាកាលពីថ្ងៃទី២៣ ខែតុលា ឆ្នាំ២០១៨នៅទីស្នាក់ការនៃគណៈកម្មារធិការជាតិអូឡាំពិកកម្ពុជាដែលមានវត្តមានឯកឧត្តម វ៉ាត់ ចំរើន អគ្គលេខាធិការ NOCC ជាអធិបតី និងស្ថាបនិកក្លឹប Cambodian Top Team លោក ហ៊ុន ច័ន្ទរាជ ព្រមទាំងកីឡាករ កីឡាការិនីយ៉ាងច្រើនកុះករ។ លោក ហ៊ុន ច័ន្ទរាជ ជាបុគ្គលដ៏សំខាន់ម្នាក់ក្នុងការជួយជ្រោមជ្រែងឲ្យកីឡា MMA ដុះដាលឡើងនៅក្នុងប្រទេសកម្ពុជា ជាពិសេសការបញ្ជូនកីឡាករកម្ពុជាទៅប្រកួតលើឆាកអន្តរជាតិ។
បន្ទាប់ពីសហព័ន្ធត្រូវបានចាប់បដិសន្ធិឡើង លោក ហ៊ុន ច័ន្ទរាជ បានទទួលការងារជាអគ្គលេខាធិការសហព័ន្ធក្នុងនាមជាស្ថាបនិកម្នាក់។ លោកប្រាប់ថា ៖ «នេះជាជំហានថ្មីមួយឆ្ពោះទៅរកការអភិវឌ្ឍកីឡា MMA ឲ្យមានលក្ខណៈត្រឹមត្រូវ»។
«យើងមានកីឡាករជាច្រើន ប៉ុន្តែមិនមានខ្សែបណ្តាញណាសម្រាប់ពួកគាត់បង្ហាញទេពកោសល្យ សមត្ថភាពនោះទេ។ ឥឡូវនេះ យើងចង់បន្ថែមមួយជំហានទៀត ដោយបង្កើតជាសហព័ន្ធសិល្បៈយុទ្ធគុនចម្រុះដើម្បីជួយជ្រោមជ្រែងដល់ក្លឹបហ្វឹកហាត់MMA ទាំងអស់នៅកម្ពុជា»។
ដោយឡែកលោក កែបិន សូរស្មី អនុប្រធាន បានលើកឡើងអំពីសារៈសំខាន់នៃការប្រឹងប្រែងរួមគ្នារបស់ប្រទេសមួយ។ លោកថា៖ «អ្វីដែលត្រូវធ្វើដំបូង គឺវាយតម្លៃស្ថានភាពជាមុនសិន ថា តើមានក្លឹបប៉ុន្មាន ដែលយើងអាចទុកចិត្តបាន ហើយមានកីឡាករប៉ុន្មាននាក់នៅក្នុងប្រទេស និងនៅក្រៅប្រទេស។
យើងត្រូវតែប្រមូលផ្តុំកម្លាំងឲ្យអស់ដើម្បីខិតខំលើកទង់ជាតិកម្ពុជារបស់យើងឲ្យខ្ពស់ជាងមុនលើឆាកសិល្បៈក្បាច់គុនចម្រុះយើង។ មានរឿងច្រើនដែលយើងបានឆ្លងកាត់រួចហើយ ប៉ុន្តែទាំងអស់គ្នាយើងអាចធ្វើបាន យើងនឹងធ្វើ ហើយធ្វើឲ្យកាន់តែល្អ»។
លោកបន្តថា ៖«តាំងពីប្រវត្តិសាស្ត្រមក កម្ពុជាមានសង្គ្រាមជាច្រើនហូរហែ ដូច្នេះប្រជាជនខ្មែរយើងក៏បានបង្កើតក្បាច់គុនធំៗ និងមានបែបបទច្រើនខុសៗគ្នា។ សិល្បៈក្បាច់គុនចម្រុះគឺជាទម្រង់ក្បាច់មួយដ៏អស្ចារ្យដែលបង្ហាញពីប្រពៃណីនៃក្បាច់ទាំងនោះ។ ចាប់ពីពេលនេះទៅ កីឡាករប្រដាល់ក្នុងស្រុកនឹងមានគ្រឹះដ៏រឹងមាំមួយ ហើយសហព័ន្ធមានភាពជឿជាក់យ៉ាងមុតមាំថា អនាគតរបស់កីឡាករយើងនឹងមានភាពភ្លឺស្វាង និងរីកចម្រើនជាគ្រឹះសម្រាប់ក្បាច់គុនចម្រុះទៅថ្ងៃអនាគត»។
លោក សូរស្មី បន្ថែមទៀតថា ៖«យើងចង់ឱ្យកីឡាករក្បាច់គុនចម្រុះជំនាន់មុន និងជំនាន់ក្រោយទទួលបានភាពងាយស្រួលជាងមុន ហើយដូច្នេះគាត់នឹងអាចហ្វឹតហាត់បានល្អត្រឹមត្រូវតាមក្បួនខ្នាត។ ឥឡូវហ្នឹងយើងនៅតូចហើយក្មេងណាស់ មិនគួរប្រកួតប្រជែង ឬប្រយុទ្ធគ្នាឡើយ។ មានតែត្រូវសាមគ្គីគ្នា និងត្រូវតែរួមគ្នាដើម្បីកសាងសិល្បៈកីឡានេះឱ្យបានជោគជ័យត្រឹមត្រូវ»៕