Mourinho ថា Chelsea នឹងមិនទិញកីឡាករថែមទេ
- 2014-12-13 17:15:12
- ចំនួនមតិ 0 | ចំនួនចែករំលែក 0
Mourinho ថា Chelsea នឹងមិនទិញកីឡាករថែមទេ
ចន្លោះមិនឃើញ
លោក Jose Mourinho អ្នកចាត់ការក្រុម Chelsea បាននិយាយថាលោកគ្មានគម្រោងទិញកីឡាករថ្មីថែមទេ នារដូវដោះដូរកីឡាករនៅខែមករាខាងមុខនេះ។
អ្នកចាត់ការសញ្ជាតិព័រទុយហ្គាល់រូបនេះ ជឿជាក់ថាកីឡាកររបស់តោខៀវបច្ចុប្បន្ន ល្មមគ្រាប់គ្រាន់អាចអុកឡុកក្នុងពានរង្វាន់ទាំងបួន បានពេញជើងតែម្ដង។
ក្នុងន័យនេះ លោក Mourinho និយាយប្រាប់ BBC ថា៖ "យើងមិនអាចធ្វើឲ្យល្អជាងការនៅកំពូលតារាង League ក៏ឈរលើគេក្នុងពូលនៅ Champions League និងការឡើងដល់វគ្គ៨ក្រុមចុងក្រោយ Capital One Cup នោះទៀតទេ"។
Chelsea នឹងត្រូវធ្វើការធ្ងន់ចាប់ពីយប់នេះទៅ ដោយលេង៦ប្រកួតក្នុងចន្លោះពេល២០ថ្ងៃ។ យប់នេះតោខៀវនឹងធ្វើជាម្ចាស់ផ្ទះទទួលភ្ញៀវ Hull City។ ដោយសារតែកាលវិភាគប្រកួតញឹកពេក Mourinho នឹងដាក់ឲ្យកីឡាករឈុតធំខ្លះសម្រាក។
"ខ្ញុំគិតថាគ្មានកីឡាករណាម្នាក់ដែលត្រូវលេងពេញ៦ប្រកួតនោះទេ។ កីឡាករណាដែលត្រូវលេងគ្រប់ប្រកួត នឹងត្រូវបន្ថយសល់៥ ដូច្នេះពួកគេអាចសម្រាកបាន១ប្រកួត"។
អតីតអ្នកចាត់ការក្រុម Porto, Inter Milan និងReal Madrid រូបនេះ នឹងអនុញ្ញាតិឲ្យកីឡាករដែលមានស្រុកកំណើតនៅអឺរ៉ុប សម្រាក២ថ្ងៃសប្ដាហ៍ក្រោយ ក្រោយពេលចប់ការប្រកួតវគ្គ៨ក្រុមចុងក្រោយ Capital One Cup ទល់នឹង QPR នាថ្ងៃអង្គារសប្ដាហ៍ក្រោយ៕
ប្រែសម្រួល៖ អូន សៅណាត ប្រភព៖ BBC