តម្លៃផ្ទះសំណាក់នៅតំបន់៤ជុំវិញកម្ពុជា សម្បូរមនុស្សទៅឆ្លងឆ្នាំបំផុត
- 2014-12-24 18:50:05
- ចំនួនមតិ 0 | ចំនួនចែករំលែក 0
តម្លៃផ្ទះសំណាក់នៅតំបន់៤ជុំវិញកម្ពុជា សម្បូរមនុស្សទៅឆ្លងឆ្នាំបំផុត
ចន្លោះមិនឃើញ
ខេត្ត ព្រះសីហនុ សៀមរាប កែប មណ្ឌលគិរី សុទ្ធតែជាតំបន់ផ្ទាំងស៊ីបដែលយុវវ័យ និងប្រជាជនកម្ពុជារួមទាំងបរទេសផង សម្រុកទៅលម្ហែនៅឱកាស ឆ្លងឆ្នាំសកល ពាក់កណ្ដាលសប្ដាហ៍ក្រោយនេះ។
សល់ច្រើនថ្ងៃគួរសម តែផ្ទះសំណាក់ចាប់ផ្ដើមពេញបណ្ដើរៗ ឯតម្លៃហ្នឹងក៏ចាប់ផ្ដើមឡើងសន្សឹមៗ។ លោក នួន ម្សិលមិញថាគឺពេញមួយថ្ងៃតែម្ដងគ្រាន់តែ ស្វែងរកអាសយដ្ឋានដើម្បីកក់បន្ទប់មួយទុកនាំប្រពន្ធកូនទៅឆ្លងឆ្នាំនៅ ខេត្តព្រះសីហនុ។ ផ្ទះសំណាក់ជាច្រើនសុទ្ធតែពេញ។ ឯតម្លៃមួយៗមិនក្រោម៣០ដុល្លារទេ ហើយចុងក្រោយទើបលោកកក់បានបន្ទប់មួយទុកថ្ងៃទី៣១ធ្នូនិង១មករា ក្នុងតម្លៃ៥០ដុល្លារមួយយប់។
នៅឆ្នេរខេត្តព្រះសីហនុ អ្នកស្រី ផុក សៀម ម្ចាស់ផ្ទះសំណាក់ ឆ្នេរអូរត្រេះ ថាផ្ទះអ្នកស្រីមាន៣០បន្ទប់ ហើយឥឡូវនេះបន្ទប់ជាង៧០%បានកក់ទុកអស់ហើយ។ តម្លៃវិញ ធម្មតាបន្ទប់គ្រែ១តម្លៃ២០គ្រែ២តម្លៃ៣០ដុល្លារ តែឱកាសសម្បូរភ្ញៀវនេះបានឡើងខ្លះ តែអ្នកស្រីមិនបានលម្អិតថាឡើងប៉ុន្មាននោះទេ។ ទាក់ទង់ផ្ទះសំណាក់ ឆ្នេរអូរត្រេះ តាមលេខទូរសព្ទ ០១៦/៣៤ ៨៧៣ ៩៩៩។
កោះសង្សារ ដ៏រ៉ូមែនទិកនៅកម្ពុជានរណាៗឃើញហើយក៏ប្រាថ្នាទៅដល់
វិលទៅក្រុង សៀមរាប វិញផ្ទះសំណាក់មួយចំនួនចាប់អស់បន្ទប់ហើយនៅថ្ងៃដាច់ឆ្នាំ។ លោក វុធ ម្ចាស់ផ្ទះសំណាក់ ប៊ូសាវី ថា៣៤បន្ទប់ដែលលោកមាន ភ្ញៀវកក់គ្មានសល់ទេ តាំងពីមួយខែមុនម៉្លេះ។ ភ្ញៀវភាគច្រើនជាជនបរទេស កក់តាមអ៊ិនធឺណេត និងមានខ្មែរខ្លះដែរ។ អ្វីដែលពិសេសលោក វុធ ថាជាទូទៅផ្ទះលោក មិនឡើងថ្លៃទេ ទោះបុណ្យអីក៏ដោយ។ តម្លៃបន្ទប់គ្រែ១តម្លៃ១៧ដុល្លារ គ្រែ២ងថ្លៃ២២ដុល្លារ និងគ្រែ៣តម្លៃ ២៧ដុល្លារក្នុងមួយយប់ ដោយមានផ្ដល់ជូនអាហារពេលព្រឹកមិនគិតប្រាក់។ លោកប្រាប់ពីស្ថានភាពភ្ញៀវនៅផ្ទះសំណាក់ដែលមានទាំងភោជនីយដ្ឋាននៅជាមួយគ្នាផងថា៖ «ផ្ទះខ្ញុំភាគច្រើនជនបទេស ហើយថ្ងៃធម្មតាហ្នឹងក៏មិនសូវទំនេរដែរ តម្លៃគឺប៉ុណ្ណឹងរហូត»។ ទាក់ទងផ្ទះសំណាក់ ប៊ូសាវី តាមទូរសព្ទលេខ ០១២ ៨៩៨ ៦២៧។
កែប ឯនោះក៏ជាតំបន់មានប្រជាប្រិយភាពគ្រាន់បើដែរនៅថ្ងៃឆ្លងឆ្នាំ។ អ្នកទទួលភ្ញៀវនៅផ្ទះសំណាក់ Kep Seaside ដែលឯបជាប់ឆ្នេរសមុទ្រនោះ ថាផ្ទះនេះមាន៥២បន្ទប់។ បន្ទប់គ្រែ២ ដែលមានជាងពាក់កណ្ដាលបន្ទប់សរុប គេកក់ទុកអស់ហើយ។ ឯបន្ទប់គ្រែមួយនៅសល់ខ្លះ។ បន្ទាប់គ្រែ១និងគ្រែ២មានតម្លៃដូចគ្នាគឺ២០ដុល្លារថ្ងៃធម្មតា តែថ្ងៃដំណាច់ឆ្នាំរាល់បន្ទប់ឡើង១០ដុល្លារទៀត។ កញ្ញា សុខឿនអ្នកទទួលភ្ញៀវរៀបរាប់៖ «ឆ្នាំមុនសល់បន្ទប់តិចតួច តែឆ្នាំខ្លះថ្ងៃអស់ហ្នឹងពេញតែម្ដង»។ ទាក់ទងផ្ទះសំណាក់ Kep Sea Side តាមទូរសព្ទលេខ ០១២ ៦៨៤ ២៤១។
បើចាប់អារម្មណ៍ទៅដែនឦសានគឺ ខេត្តមណ្ឌលគិរិ មកដល់ព្រឹកនេះកន្លែងស្នាក់នៅហាក់មិនសូវចោទទេ។ អ្នកផ្ដល់ព័ត៌មានសណ្ឋាគារ មណ្ឌលគិរី ប្រាប់ Sabay ថាបន្ទប់កង្ហារគ្រែ១តម្លៃ ១៥ដុល្លារ គ្រែ២តម្លៃ២០ដុល្លារ។ ឯម៉ាស៊ីនត្រជាក់គ្រែ១តម្លៃ២៥ដុល្លារ គ្រែ២តម្លៃ៣០ដុល្លារ។ នេះជាតម្លៃធម្មតា តែថ្ងៃឆ្លងឆ្នាំឡើង៥ដុល្លារគ្រប់បន្ទប់ ហើយមកដល់ឥឡូវបន្ទប់ប្រមាណ២០ទៅ៣០ ត្រូវភ្ញៀវកក់រួច។ ភ្ញៀវកក់ភាគច្រើនជាភ្ញៀវខ្មែរ ពុំសូវសម្បូរបរទេសទេ។ ទាក់ទងសណ្ឋាគារមណ្ឌលគិរី តាមទូរសព្ទលេខ ០១២ ៧៧៧ ០៥៧។
អ្នកធ្លាប់ដើរលេងទៅតំបន់ខាងលើរាល់ពេលឆ្លងឆ្នាំ ឲ្យយោបល់ថាបើចង់ទៅឆ្លងឆ្នាំទីនោះ គួរឲ្យស្វែងរកបន្ទប់កក់ទុកឲ្យហើយទៅ។ ហីអើហីអើ តិចដល់ថ្ងៃលំបាករឿងហ្នឹង ព្រោះថ្លៃក៏ឡើងខ្លាំង ពិបាកក៏ពិបាករក៕
សៀមរាប គេសម្រុកទៅដល់ក ត្រជាក់ៗចុងឆ្នាំផងបើបានទៅស្រស់ស្រាយម៉េចទេហ្ន៎!
អត្ថបទ៖ ប៉ែន សុផាន់ណា