អាថ៌កំបាំង ៤ យ៉ាង ដែលនារីព្យាយាមលាក់មិនចង់ឲ្យសង្សារខ្លួនដឹង

2014-10-03 21:30:18
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សសឹងតែគ្រប់ៗគ្នា សុទតែមានអាថ៌កំបាំងរៀងៗខ្លួនមិនថាអ្នកណាៗទេ គ្រាន់តែតិច និងច្រើនតែប៉ុណ្ណោះ។ ក្រឡេកមកមើលជុំវិញយុវវ័យវិញ ជាពិសេសនារីៗតែម្តង កាន់តែសម្បូររឿងលាក់បាំងរបស់ខ្លួនច្រើនទៀត ដែលពួកគេកម្រនឹងទម្លាយប្រាប់អ្នកណាពីមុនមក សូម្បីតែសង្សាររបស់ខ្លួនក៏ពួកគេមិនធ្លាប់ប្រាប់ដែរ។ តើអ្វីទៅជាអាថ៌កំបាំងរបស់នារីៗ ម៉េចបានជាលាក់អីក៏លាក់ម្ល៉េះ?

ឆ្លើយតបទៅនឹងបញ្ហានេះ កញ្ញា ហៀង ស្រីស្រស់ អាយុ ២២ ឆ្នាំ ដែលជានិស្សិត នៃវិទ្យាស្ថានវ៉ាន់ដាបាននិយាយថា៖ ពាក្យថា លាក់បាំងមួយម៉ាត់ហ្នឹង ស្ដាប់ទៅដូចជាមិនគួរឲ្យវាកើតមានទេ តែខ្ញុំយល់ថា ចំពោះរឿងខ្លះចាំបាច់ត្រូវតែបង្ខំចិត្តធ្វើដូច្នេះ ទោះដឹងថា វាមិនសូវល្អក៏ដោយចុះ។ និយាយឲ្យចំទៅ គឺរឿងអតីតស្នេហា ជារឿងមួយដែលគួរតែលាក់បាំង ប្រសិនបើមិនចាំបាច់ ហើយសង្សារមិនសួរនាំអ្វីទេ មិនបាច់ប្រាប់គេថា យើងធ្លាប់មានសង្សារពីមុនមកទេ។

ស្រីស្រស់ បានបន្តទាំងមិនលាក់លៀមទៀតថា៖ "ខ្ញុំមិនដែលប្រាប់គេថា ខ្ញុំធ្លាប់មានសង្សារពីមុនមកនោះទេ ទោះបីជាប្រាប់ក៏គ្មានប្រយោជន៍អ្វីដែរ ណាមួយមិនចង់រំលឹករឿងឈឺចាប់ដែលធ្លាប់កើតមានពីមុនមក ហើយក៏មិនចង់ឲ្យសង្សារដឹងហើយអន់ចិត្តដែរ"។

រូបតំណាង

ខុសពីយុវជនខាងលើ កញ្ញា គង់ សុជាតា អាយុ ២៣ ឆ្នាំ និស្សិតជំនាញអក្សរសាស្ត្រអង់គ្លេស នៃសាកលវិទ្យាល័យន័រតុនឯណោះវិញ បែរជាលើកឡើងពីចំណុចផ្សេងមួយទៀតថា៖ "ខ្ញុំធ្លាប់ឮមិត្តភ័ក្តិស្រីៗគ្នាឯងជជែកគ្នាពីអាថ៌កំបាំងដែលពួកគេមិនដែលបញ្ចេញឲ្យសង្សាររបស់ខ្លួនដឹងថា ពេលខ្លះពួកគេចាប់អារម្មណ៍ជាមួយអ្នកថ្មី និងទាក់ទងជាមួយអ្នកផ្សេងក្នុងពេលតែមួយ តែពួកគេព្យាយាមលាក់បាំង"។

លើកឡើងពីប្រធានបទមួយនេះ កញ្ញា ផាត់ ស្រីពៅ អាយុ២៣ឆ្នាំ និស្សិតនៃសាកលវិទ្យាល័យបញ្ញាសាស្ត្រកម្ពុជាឯណោះវិញ បាននិយាយទៅតាមអ្វីដែលខ្លួនធ្លាប់ជួបប្រទះផ្ទាល់ថា ជឿអត់ថា មាននារីៗមួយចំនួន ប្រើប្រាស់ Account Facebook លើសពីមួយ តែគេមិនប្រាប់ឲ្យសង្សាររបស់ខ្លួនដឹងនោះទេ។

និស្សិតឆ្នាំទី៤រូបនោះថ្លែងទៀតថា៖ "ខ្ញុំដឹងរឿងនេះពីមិត្តភ័ក្តិដែលរៀនជាមួយគ្នាដែរហ្នឹង”។ និយាយទៅអ្នកដែលធ្វើបែបនេះ ភាគច្រើនជាអ្នកចូលចិត្តលេង Facebook ហើយលេងសើចជាមួយបុរសផ្សេងៗទៀតដោយមិនឲ្យសង្សាររបស់ខ្លួនដឹង មិនខុសអីពីអ្នកប្រើទូរស័ព្ទស៊ីមពីរទេ។

មិនមែនមានតែរឿងរ៉ាវទាំងអស់ខាងលើនេះទេ នៅមានរឿងមួយទៀត ដែលមនុស្សស្រីមួយចំនួន រក្សាទុកជាអាថ៌កំបាំងដែរនោះ គឺការជ្រុលជ្រួសខ្លួនប្រាណ (រួមភេទ) ។ នេះជាការលើកឡើងរបស់ យុវជន កុសល អាយុ២៤ឆ្នាំ និស្សិតនៃសាកលវិទ្យាល័យមួយ សុំមិនបញ្ចេញឈ្មោះ។

កុសល សង្កត់ធ្ងន់ទៀតថា៖ "ខ្ញុំនិយាយឲ្យអស់ទៅចុះ សម័យឥលូវយុវវ័យមួយចំនួន ខ្ញុំមិនហ៊ានវាយតម្លៃគេទាំងអស់ទេ ពួកគេទាំងនោះបានបណ្ដោយខ្លួនឲ្យឈានដល់ការរួមភេទជាមួយសង្សារទាំងមិនបានគិតគូរដិតដល់"។ ដល់ពេលជួបជាមួយបុរសក្រោយៗដែលខ្លួនស្រលាញ់ពិតប្រាកដ គិតថា អាចយកជាគូអនាគតបាន មានតែនិយាយកុហកគេថា ខ្លួនមិនធ្លាប់ដែលបានប្រព្រឹត្តឆ្លងកាត់រឿងហ្នឹងទេ៕

ចុះប្រិយមិត្តវិញ យល់យ៉ាងណាចំពោះការលើកឡើងខាងលើនេះ?

អត្ថបទ៖ យិន សំបូរ