ឆន សុវណ្ណរាជ ធ្វើខួបផ្គួបការស្រលាញ់ជាមួយក្មេងកំព្រា
- 2015-10-08 21:54:26
- ចំនួនមតិ 0 | ចំនួនចែករំលែក 0
ឆន សុវណ្ណរាជ ធ្វើខួបផ្គួបការស្រលាញ់ជាមួយក្មេងកំព្រា
ចន្លោះមិនឃើញ
តារាចម្រៀងបែបយុវវ័យ លោក ឆន សុវណ្ណរាជ ទើបបង្ហោះរូបភាពមួយចំនួនថ្ងៃខួបកំណើតលើបណ្ដាញសង្គម Facebook ដោយបានយកអំណោយទៅចែកជូនកុមារកំព្រានៅក្នុងរាជធានីភ្នំពេញមួយកន្លែង។ “អូហ៍! អូនរូបហ្នឹងបងធ្វើតាំងពីថ្ងៃ ០២ សប្ដាហ៍មុនម្ល៉េះ។ តាមពិតថ្ងៃកំណើតពិតប្រាកដរបស់លោកគឺនៅថ្ងៃ ១០ ខែ ១០ នេះទេ តែមកពីថ្ងៃនឹងបងរវល់ទើបបានជាអ្នកគាំទ្រនាំគ្នាធ្វើឲ្យបងថ្ងៃនោះតែម្ដងទៅ ហើយនេះជាបំណងដែលបងចង់ធ្វើយូរមកហើយ។”
គណៈកម្មការ Cambodian Idol រូបនេះបានឲ្យដឹងទៀតថា ការដែលលោកធ្វើបែបនេះមិនមែនជាការសម្ដែង ឬដើម្បីទាក់ទាញប្រជាប្រិយភាពអ្វីទេ តែវាជាការចង់ចែករំលែកក្ដីស្រលាញ់ដែលលោកមានចំពោះប្អូនៗកំព្រា ដែលខ្វះខាតប៉ុណ្ណោះ។ ជាពិសេសតារាប្រុសជួរមុខក្នុងផលិតកម្មរស្មីហង្សមាសបានឲ្យដឹងទៀតថា លោកមិនរើសអើងអង្គការណាទេឲ្យតែរដ្ឋាភិបាលទទួលស្គាល់ត្រឹមត្រូវ ហើយមានឱកាសលោកនឹងជួយភ្លាមតាមលទ្ធភាពដែលខ្លួនមាន។
“នេះជាខួប ៣០ ឆ្នាំ របស់ខ្ញុំ ចឹងហើយទើបខ្ញុំ និង ក្រុមអ្នកគាំទ្របានយកអំណោយតិចតួចទៅជូនមណ្ឌលកុមារកំព្រា មានទីតាំងនៅភូមិ គៀនឃ្លាំង នៅជិតជ្រោយចង្វារាជធានីភ្នំពេញ តែខ្ញុំមិនបានចាំឈ្មោះអ្វីទេដោយមានប្អូនៗជាង ៤០ នាក់។ ក្នុងនោះរួមមានថវិកាផ្ទាល់ខ្លួនខ្ញុំបន្តិចបន្តួចជាទឹកចិត្តរបស់បងផ្ទាល់ អំណោយសប្បុរសជន និង មានការធ្វើអាហារញ៉ាំជុំគ្នានៅទីនោះផងដែរ។”
មិនត្រឹមតែប៉ុណ្ណោះថ្មីៗនេះម្ចាស់បទ "ទីក្រុងគ្មានមេឃ" ទើបបានចូលរួមកម្មវិធីមួយនៅសាលាតិចណូ ដើម្បីស្វែងរកថវិកាជូនមណ្ឌលកុមារកំព្រា NACA ដែលគ្រប់គ្រងដោយលោកតា ហ៊្វុយសូ ដែរ ហើយនេះជាលើកទីបីហើយក្នុងឆ្នាំ ២០១៥ ដែលលោកបានទៅជួយប្អូនៗកុមារកំព្រា។
រាជ បានបន្តទៀតថាគោលបំណងក្នុងការធ្វើនេះគឺដើម្បីឲ្យ Fan ក៏ដូចជាបងប្អូនមួយចំនួនដែលមានម៉ាក់ប៉ាជាអ្នកគ្រប់គ្រងសុំកុំទាមទារអ្វីដែលហួសហេតុពេក ហើយឲ្យសម្លឹងទៅមើលប្អូនៗទាំងនោះទៅថាពួកគាត់គ្មានឪពុក-ម្ដាយ តែពួកគាត់នៅតែតស៊ូបានគ្រប់ពេលវេលា៕
អត្ថបទ៖ទ្រី រ៉ាវី
រូបភាព៖Facebook