ឯកឧត្ដម សុក ស៊ីផាន់ណា៖ ដើមឆ្នាំក្រោយកម្ពុជានឹងមានច្បាប់ E-Commerce

2015-11-18 18:03:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ការធ្វើអាជីវកម្មតាមប្រព័ន្ធអេឡិចត្រូនិក ឬ ការធ្វើអាជីវកម្មតាមអនឡាញ ដែលមានជាភាសាអង់គ្លេសថា E-Commerce គឺកំពុងមានកំណើនខ្លាំងនៅកម្ពុជា ក្នុងរយៈពេលប៉ុន្មានឆ្នាំចុងក្រោយនេះ។ ត្បិតអាជីវកម្មនេះ បានផ្ដល់ភាពងាយស្រួលច្រើនក្ដី ប៉ុន្តែហានិភ័យ ដូចជាការភ័ន្តច្រឡំ និងរូបភាពបោកប្រាស់ផ្សេងៗនៅតែមាន ហើយដើម្បីធានាបានសុវត្ថិភាព ពាណិជ្ជកម្មរបស់អាជីវករ ឯកឧត្ដម បណ្ឌិត សុក ស៊ីផាន់ណា ទីប្រឹក្សារាជរដ្ឋាភិបាលបានថ្លែងថា ឆ្នាំក្រោយលោកសង្ឃឹមច្បាប់ E-Commerce នឹងលេចជារូបរាងឡើង។

ឯកឧត្ដម បណ្ឌិត សុក ស៊ីផាន់ណា ទីប្រឹក្សារាជរដ្ឋាភិបាលកម្ពុជា

“កាលពីឆ្នាំមុនឯកឧត្ដមទេសរដ្ឋមន្ត្រី ស៊ុន ចាន់ថុល បានស្នើឱ្យខ្ញុំជួយតាក់តែងច្បាប់ E-Commerce។ ខ្ញុំបំពេញកាតព្វកិច្ចរបស់ខ្ញុំហើយ ឥលូវសរសេរចប់ហើយ អន្តរក្រសួងហើយ នៅទាំងអស់នៅក្រសួងពាណិជ្ជកម្ម គេនឹងរុញទៅគណៈរដ្ឋមន្ត្រី។ សង្ឃឹមថានៅដើមឆ្នាំក្រោយ យើងនឹងមានច្បាប់ E-commerce នេះឯង"។

មានប្រជាជនមួយចំនួនមិនថា អ្វីជា E-Commerce ឡើយ នេះបើតាមការលើកឡើងរបស់ឯកឧត្ដម សុក ស៊ីផាន់ណា ក្នុងទិវា Global Entrepreneurship Week 2015 ក្រោមប្រធានបទ "Cambodia's E-entrepreneurship” កាលពីថ្ងៃទី១៤ ខែវិច្ឆិកា ឆ្នាំ២០១៥ នៅមជ្ឈមណ្ឌលសហប្រតិបត្តិការកម្ពុជា-ជប៉ុន CJCC។

លោកថ្លែងថា៖ "E-Commerce៖ E គឺអេឡិចត្រូនិក សំដៅលើឧបករណ៍ បើយើងលុប E ចេញនៅសល់ Commerce។ Commerce ហ្នឹងជាពាណិជ្ជកម្ម...ពាណិជ្ជកម្មគឺជាកិច្ចព្រមព្រៀងរវាងអ្នករកស៊ីជាមួយគ្នា អាហ្នឹងពាណិជ្ជកម្ម ទាំងអ្នកនាំចូល ទាំងអ្នកនាំចេញ ទាំងអ្នកទិញ ទាំងអ្នកលក់។ គ្រាន់ថាអាមួយធ្វើពាណិជ្ជកម្មនៅលើដី ចាប់ដៃគ្នា ខ្ញុំទិញអ្នកឯង ខ្ញុំបង់លុយ អាហ្នឹងពាណិជ្ជកម្មតាមធម្មតា បើ E-Commerce ពាណិជ្ជកម្មដែរ ប៉ុន្តែអត់បានចាប់ដៃគ្នាទេ កុំព្យូទ័រទេដែលចាប់ដៃនោះ។ បើខ្ញុំមានពេលខ្ញុំនឹងពន្យល់ថាតើច្បាប់ហ្នឹងមានកិច្ចសន្យាយ៉ាងម៉េច? គេមើលទៅលើអី? អ៊ីចឹងច្បាប់ E-Commerce គឺជាច្បាប់កិច្ចសន្យា”។

តាមការបញ្ជាក់របស់ឯកឧត្ដម ពេលកម្ពុជាចូលសមាហរណកម្មសេដ្ឋកិច្ចអាស៊ាន ប្រទេសកំពុងអភិវឌ្ឍន៍មួយនេះ នឹងក្លាយជាតំបន់ពាណិជ្ជទូលាយ ដែលអាចទាក់ទាញវិនិយោគិនជាច្រើន និងជាឱកាសដ៏ល្អមួយ សម្រាប់ពលរដ្ឋខ្មែរប្រកួតប្រជែង ក្នុងការធ្វើអាជីវកម្មតាមប្រព័ន្ធផ្សេងៗ៕

ចំណុចស្នូល៦យ៉ាងនាំឱ្យយុវជនខ្មែរមានគំនិតចង់បង្កើតរបរផ្ទាល់ខ្លួន

តើ E-Commerce ជាអ្វី?

កញ្ញា សុខ ផាណានីដា៖ ភាពជាសហគ្រិនមិនស្ថិតលើដុង ឬទៅលើការសិក្សាតែមួយនោះទេ

អត្ថបទ៖ អ៊ុំ សុភក្តិ