ស្ម័គ្រអៀវមិត្តភ័ក្ដិពិការទៅរៀនរាប់ឆ្នាំ សង្ឃឹមបានរៀនដល់វិទ្យាល័យជាមួយគ្នា
- 2016-04-15 19:01:06
- ចំនួនមតិ 0 | ចំនួនចែករំលែក 0
ស្ម័គ្រអៀវមិត្តភ័ក្ដិពិការទៅរៀនរាប់ឆ្នាំ សង្ឃឹមបានរៀនដល់វិទ្យាល័យជាមួយគ្នា
ចន្លោះមិនឃើញ
Wang Xiaohu និង Feng Yichong គឺជាមិត្តអង្គុយតុជាមួយគ្នានៅអនុវិទ្យាល័យ ក្នុងប្រទេសចិន។ មិត្តភាពរបស់ពួកគេបានចាប់ផ្ដើមដោយសារពាក្យសន្យាមួយ។
Feng មានជំងឺខ្វិនតំណពូជតាំងពីកំណើត។ ដំបូងជំងឺនេះគ្រាន់តែធ្វើឲ្យគេដើរមិនបានលឿនដូចក្មេងដទៃប៉ុណ្ណោះ ប៉ុន្តែក្រោយមក អាការៈកាន់តែធ្ងន់ធ្វើឲ្យ Feng មិនអាចដើរបានតែម្ដង ប្រសិនបើគ្មានជំនួយ។ Wang បានផ្ទេរមករៀននៅសាលាបឋមជាមួយ Feng នៅឆ្នាំ២០១៤ ហើយក្មេងប្រុសទាំងពីរនាក់ក៏បានក្លាយជាមិត្តអង្គុយរួមតុជាមួយគ្នា។ ដោយឃើញពីបញ្ហារបស់មិត្តភ័ក្ដិ Wang បានស្ម័គ្រចិត្តជួយគ្រាហ៍គេដើរមកថ្នាក់រៀនរាល់ថ្ងៃ ហើយអ្នកទាំងពីរក៏ក្លាយជាមិត្តដ៏ស្និទ្ធស្នាល។
នៅឆ្នាំ២០១៥ Feng និង Wang នៅតែរៀនថ្នាក់ជាមួយគ្នា នៅសាលាមធ្យមសិក្សា។ ស្ថានភាពរបស់ Feng កាន់តែអាក្រក់ ហើយគេមិនអាចសូម្បីតែក្រោកឈរខ្លួនឯង។ Wang បានសន្យាជួយ Feng មកថ្នាក់រៀនដដែល ហើយមិនយូរប៉ុន្មានគេក៏អៀវ Feng ទៅសាលារាល់ថ្ងៃ។ បើទោះជា Wang លែងស្នាក់នៅក្នុងសាលា គេនៅតែចូលទៅយក Feng ពីបន្ទប់ស្នាក់នៅ ទៅថ្នាក់រៀនរាល់ព្រឹក និងល្ងាច។ នៅចុងឆ្នាំ២០១៥ គ្រូពេទ្យរបស់ Feng បានប្រាប់គេថា គេប្រហែលជាមិនអាចដើរដោយខ្លួនឯងបានរៀងរហូត។ ឮដូច្នេះ Feng បានគិតចង់ឈប់រៀន។ Wang បានជំរុញនិងលួងលោមមិត្ត ដោយសន្យាថា៖ "ដរាបណាយើងនៅរៀនសាលាជាមួយគ្នា ខ្ញុំនឹងនៅតែអៀវឯងជានិច្ច"។
មកដល់ពេលនេះគឺពីរឆ្នាំហើយដែល Wang បានស្ម័គ្រចិត្តជួយ Feng។ Wang នៅតែរក្សាជំហររបស់ខ្លួនក្នុងការជួយមិត្ត និងនិយាយថា៖ "ខ្ញុំសង្ឃឹមថាយើងអាចរៀនវិទ្យាល័យ និងមហាវិទ្យាល័យជាមួយគ្នា ដូច្នេះខ្ញុំនឹងអាចនៅជួយគេរហូត" ៕
ប្រែសម្រួល៖ វ៉ាន់ថន ប្រភព៖ people