មូលហេតុធំ៣ ធ្វើឲ្យប្រជាជនខ្មែរប្រារព្ធពិធីបុណ្យភ្ជុំបិណ្ឌ
- 2016-09-20 23:10:35
- ចំនួនមតិ 0 | ចំនួនចែករំលែក 0
មូលហេតុធំ៣ ធ្វើឲ្យប្រជាជនខ្មែរប្រារព្ធពិធីបុណ្យភ្ជុំបិណ្ឌ
ចន្លោះមិនឃើញ
ភ្ជុំបិណ្ឌ ជាពិធីបុណ្យប្រពៃណីជាតិដ៏ធំមួយ ដែលប្រជាជនខ្មែរប្រារព្ធធ្វើរៀងរាល់ឆ្នាំពីថ្ងៃ ១រោច រហូតដល់ថ្ងៃទី ១៥រោច ខែភទ្របទ។ មានរឿងរ៉ាវ ព្រមទាំងប្រវត្តិជាច្រើន ដែលជាប់ពាក់ព័ន្ធ និងបណ្ដាលឲ្យប្រជាជនខ្មែរប្រារព្ធពិធីនេះឡើង ប៉ុន្តែក្នុងអត្ថន័យស្រដៀងគ្នា គឺឧទ្ទិសផលបុណ្យជូនអ្នកដែលបានស្លាប់ទៅកាន់លោកខាងមុខហើយ។
បើតាមព្រះភិក្ខុមួយអង្គព្រះនាម អូម ភាព ដែលកំពុងគង់នៅវត្តសិរីសាគរ ក្នុងស្រុកកំពង់ត្របែក ខេត្តព្រៃវែង បានមានសង្ឃដីកាថា មានមូលហេតុធំ៣ ដែលនាំឲ្យប្រជាជនខ្មែរប្រារព្ធពិធីបុណ្យភ្ជុំបិណ្ឌនេះឡើង។
ទី១៖ កាលជំនាន់ពុទ្ធកាល ពុទ្ធបរិស័ទបាននាំគ្នាទំនុកបម្រុងដល់ព្រះសង្ឃជាបច្ច័យបួន មានរយៈពេល ៣ខែ ចាប់ពីថ្ងៃចូលវស្សារហូតដល់ថ្ងៃចេញវស្សា។ ប៉ុន្តែក្រោយមក ដោយសារពុទ្ធបរិស័ទចេះតែហោចទៅ អ្នកប្រាជ្ញ បណ្ឌិតទាំងឡាយក៏បានកំណត់យកថ្ងៃបុណ្យភ្ជុំបិណ្ឌ ១៥ថ្ងៃ ដើម្បីឲ្យប្រជាជនយកចង្ហាន់ទៅវត្ត ពីព្រោះជារដូវវស្សា ពិបាកដល់ព្រះសង្ឃស្វែងរកភត្តាហារ។
ទី២៖ គឺធ្វើដើម្បីឧទ្ទិសផលនេះជូនដល់បុព្វការីជន ដែលបានបែកកាយរំលាយខន្ធទៅកាន់លោកខាងមុខ ជាយូរយារមកហើយក្ដី ឬថ្មីៗនេះក្ដី ដើម្បីឲ្យលោកបានសោយសុខនៅឋានទីទាបពុំរាបស្មើទាំងនោះ និងដើម្បីឲ្យឆាប់បានទៅចាប់ជាតិនៅភពថ្មីទៀត។
ទី៣៖ គឺដើម្បីប្រយោជន៍បច្ចុប្បន្នកាលនេះ ធ្វើបុណ្យឲ្យបានសេចក្ដីសុខចម្រើន មានចិត្តជ្រះថ្លា មានសិរីសួស្ដីដែលកើតពីផលទានរបស់ខ្លួន។ ម្យ៉ាងវិញទៀត ភ្ជុំបិណ្ឌក៏ជាពេលវេលាជួបជុំកូនចៅ ដែលបានចាកចេញទៅរកស៊ីទីជិត ទីឆ្ងាយ មកធ្វើបុណ្យទាំងអស់គ្នា៕
អត្ថបទ៖ គង់ វិសាល