មិត្តភ័ក្ដិជំពាក់លុយមិនព្រមសង គួរប្រើវិធីសាស្ត្របែបណា?

2016-11-03 16:08:35
ចំនួនមតិ 0 | ចំនួនចែករំលែក 0

ចន្លោះមិនឃើញ

មានមនុស្សមិនតិចនាក់ទេដែលកំពុងពិបាកចិត្តរឿងលុយឱ្យគេខ្ចីហើយ បែរជាមិនសង ហើយក៏មិនហ៊ានទារ និងមិនដឹងថាគួរធ្វើយ៉ាងម៉េច ព្រោះខ្លាចគេអន់ចិត្ត។ ពេលនេះ អ្នកត្រូវបានគេខ្ចីលុយជាញឹកញាប់ស្ម័គ្រចិត្តបង្ហើបពីរបៀបទារលុយពីអ្នកជំពាក់ហើយធ្វើភ្លេច ដោយប្រើវិធីសាស្ត្រមួយចំនួនដូចខាងក្រោម៖

១. បង្ហោះ Status ន័យបញ្ឆិតបញ្ឆៀងតាម Facebook៖

លឹម ងួន ដែលជាបុគ្គលិកនៅក្នុងក្រុមហ៊ុនឯកជនមួយកន្លែង ហើយក៏ជាអ្នកត្រូវបានគេឧស្សាហ៍ខ្ចីលុយមានទាំងអ្នកសង និង អ្នកមិនទាន់សងបាននិយាយថា៖ "បាទបងហ្នឹងហើយ បងសួររឿងគេជំពាក់ហើយធ្វើភ្លេចនឹងត្រូវរឿងហ្មង"។

យុវជនរូបនេះបន្តទៀតថា៖ "អ្នកខ្លះគេអោយខ្ចីលុយហើយ ដល់ថ្ងៃត្រូវសងស្ងាត់អោយឈឹង ពេលជួបមុខយើងធ្វើធម្មតាដូចអត់ខ្វល់អីតិច ចឹងបើសម្រាប់ខ្ញុំ post status តាមហ្វេសបុក សរសេរន័យបញ្ឆិតបញ្ឆៀងដើម្បីអោយគេដឹងខ្លួនខ្លះ"។ លីម ងួន ប្រាប់ថាមានអ្នកជំពាក់ជិត 300$ ដែរមិនដឹងថ្ងៃណាសងអស់ទេទារបានម្ដងបន្តិចៗ។

២. ត្អូញត្អែរនៅមុខអ្នកជំពាក់លុយ៖ នៅត្រង់ចំណុចនេះគឺជាតិកនិកទី២របស់យុវជន លឹម ងួន ដោយគាត់បានបន្តទៀតថា៖ "មួយទៀតបង បើយើងបង្ហោះពាក្យបញ្ឆិតបញ្ឆៀងហើយអ្នកជំពាក់ហ្នឹងមិនអើពើ ថ្ងៃណាជួបគេយើងត្អូញត្អែរនៅមុខចំៗទៅថា ហឹម... អស់លុយចាយអាលីង ពិបាកចិត្តណាស់មើលទៅទាល់តែទៅរកទៅចងការប្រាក់គេចាយសិនហើយ"។

យុវជនដែលគ្រាំចិត្តដោយសារគេខ្ចីលុយក្រសងរូបនេះ បានបញ្ជាក់ថា នៅពេលដែលគាត់ធ្វើដូចនេះគឺមានប្រសិទ្ធភាពដែរដោយពួកគាត់និយាយថា៖ "អូរនិយាយចឹងភ្លេចអោយឈឹងជំពាក់លុយ ងួន ឯងអត់ទាន់សង"។

៣. សួរត្រង់ៗតែម្ដង៖

រតន យុវជនសម្បូរសាច់ នៅខេត្តកំពង់ចាម ដែលមានអ្នកជំពាក់លុយហើយមិនព្រមសងម្នាក់ដែរបានត្អូញត្អែរថា "ហឹម...បងអើយនិយាយរឿងគេជំពាក់លុយអីចឹង ខ្ញុំពិបាកចិត្តទៀតហើយ គេជំពាក់ខ្ទង់ពាន់ដុល្លារដែរនៅមិនទាន់សងអស់ទេ បានម្ដងតិចៗ កុំតែយើងណាស់ហ្នឹងកុំអីគ្មានសងទេ" ។

យុវជនខាងលើបន្តទៀតថា៖ "ដល់ដំណាក់កាលហើយបើយើងនៅតែខ្លាចគេអន់ចិត្តទៀត អត់កើតទេ បើគាត់អ្នកជំពាក់យើងគាត់មិនទាំងខ្លាចចិត្តយើងផង មានតែសួរត្រង់ៗទៅថា ម៉េចហើយមានលុយនៅ ខ្ញុំអស់លុយចាយហើយណា យើងមកខ្ចីលុយខ្ញុំឡើងស្រួលដល់សងពិបាកម៉េស...។

រតនបានប្រាប់ទៀតថាធ្វើបែបនេះអ្នកជំពាក់លុយគាត់អាចភ្ញាក់ខ្លួនខ្លះហើយសងបណ្ដាក់ម្ដងបន្តិចៗមកដល់ថ្ងៃនេះនៅមិនទាន់គ្រប់ទេ ហើយរឿងដែលគាត់ក្ដៅចិត្តនោះគឺអ្នកជំពាក់លុយគាត់ហ៊ឺហាជាងគាត់ទៅទៀត។

៤. និយាយឱ្យមិត្តភ័ក្ដិ និងគ្រួសារគាត់ឮ៖ ស្រីនិច ដែលជាយុវតីធ្វើការនៅផ្សារទំនើបមួយ ក៏បានត្អូញត្អែរពីអ្នកជំពាក់លុយនេះដែរថា៖ "អ្នកជំពាក់លុយខ្ញុំហៅលែងឮហើយបងអើយ.. គ្រាន់តែញ៉ុមតេសួរគេរឿងលុយគេប្លុកលេខ ប្លុកហ្វេសបុកអស់បាត់ ដល់ចឹងអត់ដឹងនិយាយថាម៉េច"។

ស្រីនិច ប្រាប់ពីតិកនិករបស់ខ្លួនទៀតថា៖ "បើគាត់ធ្វើចឹងមានតែប្រាប់មិត្តភ័ក្ដិគាត់ ឬបើស្គាល់គ្រួសារគាត់ យើងនិយាយប្រាប់គាត់តែម្ដង ថាយើងខំអោយលុយគាត់ខ្ចីមិនព្រមសងទេថែមទាំងប្លុកលេខចោលទៀត" ។ ស្រីនិចប្រាប់ថាវិធីនេះអាចជួយគាត់យកលុយមកវិញបានខ្លះដែរ។

អត្ថបទ៖ ថោ ច័ន្ទឬទ្ធិ