ថៃជាប់លេខ១ មានចរាចរណ៍កកស្ទះបំផុត លើពិភពលោក

2017-02-21 08:08:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសថៃ បានជាប់ឈ្មោះជាប្រទេសដែលមានចរាចរណ៍កកស្ទះបំផុត នៅក្នុងឆ្នាំ២០១៦។ នេះបើយោងតាមការសិក្សាមួយ ដែលបានចេញផ្សាយ កាលពីថ្ងៃច័ន្ទ ដោយក្រុមហ៊ុនផ្ដល់សេវាកម្មអ៊ីនធឺណិត និងកម្មវិធីទូរសព្ទទាក់ទងទៅនឹងចរាចរណ៍ និងអ្នកបើកបរ INRIX។

អ្នកបើកបរនៅក្នុងប្រទេសថៃ ជាមធ្យមបានចំណាយពេល ចំនួន៦១ម៉ោង ជាប់គាំងនៅលើដងផ្លូវ កាលពីឆ្នាំមុន តាមពីក្រោយដោយអ្នកបើកបរ នៅក្នុងប្រទេសកូឡុំប៊ី និងឥណ្ឌូនេស៊ី ដែលជាមធ្យមចំណាយពេល ៤៧ម៉ោង។

ក្រុមហ៊ុន INRIX ដែលមានមូលដ្ឋាន នៅក្នុងទីក្រុង Kirkland រដ្ឋ Washington សហរដ្ឋអាមេរិក បានប្រមូលផ្ដុំ និងវិភាគទិន្នន័យ ដែលប្រមូលបានពីហេដ្ឋារចនាសម្ព័ន្ធរថយន្ត និងផ្លូវ។ ក្រុមហ៊ុននេះបានឲ្យដឹងថា របាយការណ៍ចុងក្រោយបង្អស់ គឺពឹងផ្អែកលើទិន្នន័យ ចំនួន៥០០តេរ៉ាបៃ (Terabyte) មកពីជាង៣០០លានប្រភព។

គួរបញ្ជាក់ផងដែរថា ទីក្រុងចំនួន១ ០៦៤ មកពី ៣៨ប្រទេស នៅជុំវិញពិភពលោក ត្រូវបានគេយកមកសិក្សា និងផ្ដល់ចំណាត់ថ្នាក់។

ក្នុងចំណោមទីក្រុង នៅក្នុងប្រទេសថៃ ការសិក្សាបានឲ្យដឹងថា អ្នកបើកបរនៅក្នុងទីក្រុងបាងកក បានចំណាយពេលជាមធ្យម ចំនួន៦៤,១ម៉ោង កកស្ទះចរាចរណ៍ ដោយក្នុងនោះ មាន២៣ភាគរយ កកស្ទះគ្រប់ពេល និង ជាមធ្យម ៣៣ភាគរយ កកស្ទះនៅពេលព្រឹក (៦ ដល់ ១០ព្រឹក) និង ល្ងាច (៤ ដល់ ៨យប់) ដោយបានខ្ជះខ្ជាយសាំងជាច្រើនឥតប្រយោជន៍៕