៥យ៉ាង បុរសគួរធ្វើឲ្យអស់ចិត្ត មុនសម្រេចបញ្ចប់ជីវិតនៅលីវក្នុងរោងការ

2017-08-31 08:58:08
ចំនួនមតិ 0 | ចំនួនចែករំលែក 0

ចន្លោះមិនឃើញ

អាពាហ៍ពិពាហ៍ គឺជាការចាប់ផ្ដើមអនាគត ដោយមនុស្យ ២នាក់ដើររួមផ្លូវគ្នា ហើយមានទំនួលខុសត្រូវជាច្រើន មិនដូចជីវិតនៅលីវឡើយ។ មនុស្សប្រុស ខ្លាចបំផុត គឺបាត់បង់សេរីភាពនៅពេលរៀបការរួច ខណៈអ្នកខ្លះទៀត មិនទាន់សម្រេចអ្វីដែលខ្លួនចង់ធ្វើ ក៏ចាប់ផ្ដើមជីវិតមានគូបាត់ ទាំងស្ដាយភាពយុវវ័យ។

បើមិនចង់ស្ដាយក្រោយ គួរធ្វើរឿងទាំង៥ ខាងក្រោមនេះ ឲ្យអស់ចិត្តសិន៖

១. ដើរលេងផ្សងព្រេងជាមួយមិត្តភ័ក្ដិ៖ មនុស្សប្រុសចូលចិត្តដំណើរផ្សងព្រេងណាស់ ជាពិសេសដើរលេងជាមួយមិត្តភក្ដិជិតដិតផ្សងគ្រោះថ្នាក់ចូលព្រៃ ឆ្លងសមុទ្រជាដើម។ យ៉ាងណាមិញ ពេលរៀបការរួច មិនអាចធ្វើរឿងទាំងនេះបានឡើយ ហើយកម្រណាស់ ដែលអាចទៅដើរលេងសប្បាយ ចោលប្រពន្ធនោះ។

ដូចនេះ មុនពេលសម្រេចចិត្តចូលរោងការ កសាងអនាគតជាមួយនារីម្នាក់ហើយ ត្រូវដើរលេងក្នុងនាមជាមនុស្សនៅលីវឲ្យឆ្អែតអស់ចិត្តសិន។ ម្យ៉ាងវិញទៀត ការដើរលេងស្គាល់គ្រប់កន្លែង ក៏ជាប្រយោជន៍ ក្រោយរៀបការរួចនាំមនុស្សជាទីស្រលាញ់ ទៅកន្លែងដែលខ្លួនធ្លាប់ទៅ ធ្វើជាមគ្គទេសក៍ខ្លួនឯងតែម្ដង។

២. ទិញរបស់ដែលចង់ទិញឲ្យគ្រប់សិន៖ ចង់បានរបស់អ្វីដែលខ្លួនស្រលាញ់ ដូចជាសម្ភារៈបច្ចេកវិទ្យា សំលៀកបំពាក់ទាន់សម័យ របស់ថ្លៃៗលំអជីវិត ឬប្ដូរម៉ូតូ-ឡានជាដើម អាចចាប់ផ្ដើមមុនពេលរៀបការ ប្រសិនបើមានលុយផ្ទាល់ខ្លួន ព្រោះអ្នកមិនអាចស្មានចិត្តត្រូវទេ ថាមនុស្សដែលអ្នកស្រលាញ់ ដៃទូលាយដូចអ្នក។

៣. ហៅមិត្តភក្ដិធ្លាប់រៀនជាមួយ ជួបជុំគ្នាឲ្យបានច្រើនដង៖ បន្ទាប់ពីបញ្ចប់ការសិក្សារៀងខ្លួន ម្នាក់ៗប្រាកដជានៅឆ្ងាយពីគ្នា គ្មានភាពជិតស្និទ្ធឡើយ ហើយពេលរៀបការរួច រឹតតែឆ្ងាយទៅទៀត ព្រោះរវល់រឿងគ្រួសារ។ មុនពេលចូលរោងការ គួរឧស្សាហ៍ជួបជុំ ណាត់ជាមួយមិត្តភក្តិជជែកគ្នាលេងឲ្យអស់ចិត្ត រំឭករឿងចាស់ៗឡើងវិញ។ ម្យ៉ាងវិញទៀត វាជារឿងល្អ ដែលជួបច្រើនដង មុនពេលហៅការ។ ចៀសវាង ណាត់ជួបលើកទី១ ដើម្បីអញ្ជើញចូលរួមពិធីមង្គលការតែម្ដង គឺមិនល្អទេ។

៤. រៀនគ្រប់វគ្គតាមចិត្តចង់៖ រៀនលេងហ្គីតា រៀនថតរូប រៀនឧបករណ៍តន្រ្តី គួររៀនឲ្យអស់មុនពេលរៀបការ ព្រោះពេលរៀបការរួច អ្នកមានទំនួលខុសត្រូវជាច្រើន មិនអាចយកពេលទៅធ្វើរឿងទាំងនោះឡើយ។ ម្យ៉ាងវិញទៀត ពេលអ្នកនៅលីវ មានសេរីភាព មានពេលវេលា និងមិនសូវជាឆ្គងឡើយ ក្នុងការធ្វើរឿងទាំងនោះ។ ប៉ុន្តែបើរៀបការរួច ប្រាកដជាមើលទៅ ហាក់ឆ្គងបន្តិច ដែលទៅរៀនលេងហ្គីតា ឬឧបករណ៍តន្ត្រីនានានោះ។

៥. ជ្រើសរើសការងារដែលពេញចិត្ត៖ មុនពេលឈានជើងចូលក្នុងជីវិតគូ គួរធ្វើតាមចិត្ត ជ្រើសរើសការងារសម្រាប់ជីវិតឲ្យប្រសើរមួយសិន។ ត្រូវមើលថា ការងារនោះមានលំនឹងឬទេ? មានប្រាក់ខែគ្រប់គ្រាន់សម្រាប់គ្រួសារមួយឬទេ? បើមិនទាន់អាចទប់ទល់រួច កុំទាន់ចូលរោងការ ព្រោះអាចនាំបញ្ហាទៅថ្ងៃខាងមុខ។ នៅពេលគ្មានការងារជាប់លាប់ អ្នកប្រាកដជាបង្ខំចិត្តប្ដូរពីមួយទៅមួយ ទាំងខ្លួនមិនស្រលាញ់ ដើម្បីបំពេញចំណូលគ្រួសារ ខុសពីពេលនៅលីវ៕

ចុចអានអត្ថបទ៖

ប្រភព៖ Mensxp ប្រែសម្រួល៖ គង់ វិសាល