ផ្ទះស្នាក់ អូរសោម ទីឋានធម្មជាតិ មិនចាំបាច់មាន ម៉ាស៊ីនត្រជាក់
- 2017-11-10 05:06:20
- ចំនួនមតិ 0 | ចំនួនចែករំលែក 0
ផ្ទះស្នាក់ អូរសោម ទីឋានធម្មជាតិ មិនចាំបាច់មាន ម៉ាស៊ីនត្រជាក់
ចន្លោះមិនឃើញ
ផ្ទះស្នាក់ អូរសោម (Home Stay) កំពុងក្លាយជាទីចាប់អារម្មណ៍សម្រាប់ភ្ញៀវអន្តរជាតិ ដែលបានទៅលេងកម្សាន្តនៅឃុំអូរសោម ស្រុកវាលវែង ដោយមានចម្ងាយប្រមាណជាង ១០០គីឡូម៉ែត្រ ពីទីរួមខេត្តពោធិ៍សាត់។ ផ្ទះស្នាក់នេះ ផ្ដួចផ្ដើមគំនិតឡើងដោយ លោក នួន លីម មន្ត្រីកិច្ចសន្យារបស់មន្ទីរទេសចរណ៍ នៅខេត្តពោធិ៍សាត់។
លោក នួន លីម អតីតមន្ត្រីបរិស្ថានបានចំណាយទុនដំបូង ៤ពាន់ដុល្លារ ដើម្បីធ្វើផ្ទះស្នាក់ (Home Stay) ដែលមាន ៥បន្ទប់ ក្នុងគោលបំណងផ្ដល់កន្លែងស្នាក់ដល់ជនបរទេស ដែលមកកម្សាន្តនៅសហគមន៍អូរសោម និងចង់ផ្សព្វផ្សាយ អំពីវប្បធម៌ខ្មែរ ដល់ពួកគេផង។ លក្ខណៈពិសេស នៃផ្ទះស្នាក់នៅទីនេះ គឺមានខ្យល់អាកាសបរិសុទ្ធ ធានាថា ត្រជាក់ មិនចាំបាច់មានម៉ាស៊ីនត្រជាក់ ក៏ត្រជាក់ស្រួលបែបធម្មជាតិ និង សម្រស់ធម្មជាតិស្រស់ស្អាត នៅសហគមន៍អូរសោម ទាំងមូល។
លោក លីម ដែលបានចំណាយពេល១០ឆ្នាំ លើការថែរក្សាធនធានធម្មជាតិ ការពារសត្វព្រៃ និង ព្រៃឈើ នៅសហគមន៍អូរសោម បានលើកឡើងថា មុនដំបូងលោកមិនមានបំណងបង្កើតជាផ្ទះស្នាក់នោះទេ ប៉ុន្តែ ដោយបានក្លាយជាតំណាងផង និងជាអ្នកផ្ដល់ព័ត៌មានទេសចរនៅស្រុកវាលវែង ហើយភ្ញៀវទេសចរបរទេស ដែលមកស្នាក់ផ្ទះរបស់លោកតែងតែជំរុញលើកទឹកចិត្ត ឲ្យលោកបង្កើតជាផ្ទះស្នាក់ ក៏សម្រេចបង្កើតវាឡើងទៅ។
«អស់រយៈពេល ១០ឆ្នាំ ខ្ញុំបានធ្វើជាមន្រ្តីអភិរក្សធនធានធម្មជាតិ ការពារសត្វព្រៃ និង ព្រៃឈើ ក្រោយមកខ្ញុំចេញចូលៗ នៅស្រុកនេះ ជាស្រុកកំណើតខ្ញុំផង ចឹង! ខ្ញុំមានគំនិតចង់ជួយបងប្អូននៅតំបន់នេះ ដោយសារប្រជាជននៅតំបន់នេះ ការអប់រំនៅមានកម្រិត ចឹង! ខ្ញុំមានគំនិតផ្ដួចផ្ដើមនាំក្មេងៗ បង្កើតសាលារៀនភាសាអង់គ្លេស។ ក្រោយមកទៀតមានជនបរទេស ពួកគេលើកទឹកចិត្តពួកខ្ញុំឲ្យបង្កើតជាផ្ទះស្នាក់ ហើយណាមួយពួកគេឃើញភរិយាខ្ញុំធ្វើម្ហូបឆ្ងាញ់ទៀត ក៏បង្កើតជាកន្លែងផ្ទះស្នាក់ផង និង លក់ម្ហូបផង។»
លោក នួន លីម បានអំពាវនាវដល់ភ្ញៀវទេសចរជាតិ និង អន្ដរជាតិ មកស្នាក់នៅ និង កម្សាន្តនៅសហគមន៍អូរសោម ជាផ្នែកមួយសំខាន់នៅក្នុងការជួយជីវភាពប្រជាជនផង និង ចូលរួមលើកស្ទួយវិស័យទេសចរ នៅសហគមន៍អូរសោម ហើយជាពិសេស ចូលរួមផ្ដល់ចំណេះដឹងដល់ពួកគេ កាត់បន្ថយការប្រកបរបរបរបាញ់សត្វ និង ងាកមកចូលរួមថែរក្សាសម្បត្តិធម្មជាតិ និង អភិរក្សសត្វព្រៃ ផងដែរ។
សហគមន៍អូរសោម ស្រុកវាលវែង ខេត្តពោធិ៍សាត់ សព្វថ្ងៃនេះ មានប្រជាជនរស់នៅប្រមាណជា ២ ០០០ នាក់ ដែលភាគច្រើនជាជនជាតិជង និង ពណ៌ ហើយនៅតំបន់នេះ មានរមណីយដ្ឋានជាច្រើន ដូចជា ទឹកជ្រោះ ឆាយប្រុយ, ល្អាងក្រពើភ្នំ, ភូមិជនជាតិ និង ភ្នំសំកុះ ជាដែនជម្រកសត្វព្រៃ៕
សូមទស្សនាវីដេអូ
តំបន់ទេសចរណ៍ «ទឹកធ្លាក់ឆាយប្រុយ» កំណប់ពិសេស នៅវាលវែង ខេត្តពោធិ៍សាត់
ចង់ឃើញសត្វព្រៃកម្រនៅកម្ពុជា គួរទៅកម្សាន្តនៅរមណីយដ្ឋានភ្នំសំកុះ ខេត្តពោធិ៍សាត់
ខេត្តពោធិ៍សាត់ ដាក់គោលដៅក្លាយជាតំបន់ផលិតបន្លែសុវត្ថិភាព