៣ ចំណុច ផលិតភាពយន្តឲ្យជោគជ័យរបស់ផលិតករជប៉ុន

2017-11-12 00:44:29
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមរយៈលោក Hayato Kawei អ្នកដឹកនាំរឿង Let's go Jet បានរៀបរាប់ពីស្ថានភាពខ្សែភាពយន្តនៅប្រទេសជប៉ុនថា ក៏ធ្លាប់ស្ថិតក្នុងភាពលំបាក ដោយសារជប៉ុនក៏ធ្លាប់ខ្វះខាត់ធនធាន រងឥទ្ធិពលបរទេស និងការនាំចូលកុនពីបរទេសយ៉ាងគំហុក កាលពីជាង ២០ឆ្នាំមុន តែបន្ចុប្បន្ន ការផលិតខ្សែភាពយន្តជប៉ុនមានការរីកចម្រើនខ្លាំង និងមានការទទួលស្គាល់ច្រើននៅលើអន្តរជាតិ។

ដើម្បីជោគជ័យលើការផលិតខ្សែភាពយន្ត អ្នកដឹកនាំដ៏ល្បីរូបនេះក៏ លើកឡើងទៀតថា៖ «ការផលិតខ្សែភាពយន្តឲ្យមានការគាំទ្រ ទាមទារឲ្យយើងមានអត្ថបទកុនល្អ អត្ថបទកុនល្អ ហើយទើបត្រូវការអ្នកសម្តែងដ៏ល្អនិងឲ្យសមជាមួយតួរអង្គ បន្តទៀតអ្នកអាចគិតគួរលើបច្ចេកទេសថត ថាតើត្រូវធ្វើបែបណាដើម្បីឲ្យខ្សែភាពយន្តរបស់អ្នកមានការទាក់ទាញ»។ អ្នកដឹកនាំរឿង ជនជាតិជប៉ុន រូបនេះ ក៏បន្តទៀតថា អ្នកដឹកនាំ ត្រូវតែធ្វើការឱ្យស្និតស្នាលជាមួយផលិតករ តួរសម្តែង និងអ្នកដឹងនាំថត ទើបមានលទ្ធផលល្អ។

ការបង្ហាញរបស់លោក Hayato Kawei អ្នកដឹកនាំដ៏ល្បីរូបនេះធ្វើឡើងក្នុងជំនួបផលិតករ អ្នកដឹកនាំរឿងខ្មែរ ជាមួយផលិតករ និងអ្នកដឹកនាំរឿងដ៏ល្បីឈ្មោះរបស់ប្រទេសជប៉ុន នៅសាលអង្គរវត្ត ដែលរៀបចំដោយក្រសូងវប្បធម៌ និងវិចិត្រសិល្បៈ សហការជាមួយមហោស្រពភាពយន្តជប៉ុន និងថ្លែងបើកកម្មវិធីដោយ ឯកឧត្តម សោម សុគន្ធ រដ្ឋមន្រ្តីស្តីទីក្រសួងវប្បធម៌ និងវិចិត្រសិល្បៈ ដើម្បីជជែកពិភាក្សា យោបល់ពីការនិពន្ធ និងការស្វែងរកប្រភពថវិកា ដើម្បីយកមកផលិតខ្សែភាពយន្ត។

បន្ទាប់ពីមានការសួរនាំដេញដោលចប់ពីការនិពន្ធ លោក Takashi Mirano ផលិតកររឿង Let's go Jet ក៏បន្តការពិភាក្សាអំពីការស្វែងរកពិភពថវិកាដើម្បីផលិតខ្សែភាពយន្ត តែជាក់ស្តែង នៅប្រទេសជប៉ុន បន្ទុកនៃការស្វែងរកថវិកានេះ ជារបស់ក្រុមហ៊ុន តែផលិតករក៏ប្រឈមមុខខ្លាំងពីការបាត់បង់តំណែង ហើយនៅជប៉ុន មិនសូវជាមានផលិតករដែលឈរជើងបានយូរនោះទេ ព្រោះវាមានប្រកួតប្រជែងខ្លាំងពីមួយឆ្នាំទៅមួយឆ្នាំ។

ដោយ លោក Takashi Mirano ផលិតករខ្សែភាពយន្តដ៏ល្បីនៅជប៉ុន លើកឡើងថា៖ «នៅជប៉ុនយើងគ្មានបញ្ហាច្រើនក្នុងការស្វែងរកថវិកានោះទេ ព្រោះក្រុមហ៊ុនទុកចិត្តលើ ការផលិតរបស់យើង ក៏ប៉ុន្តែយើងក៏ធ្លាប់ជួបបញ្ហា និងបរាជ័យដូចគ្នា មិនខុសពីនៅកម្ពុជាប៉ុន្មាននោះទេ»។ ផលិតករ ខ្សែភាពយន្តបែបមនោសច្ចនា និងបែបគំនូរជីវចលរូបនេះបន្តថា បើអ្នកចង់ធ្វើជាផលិតករភាពយន្ត អ្នកត្រូវហ៊ានសម្រេចចិត្ត និងត្រូវបង្ហាញពីចំនុចខ្លាំងរបស់អ្នក ដើម្បីបង្កើតការទុកចិត្ត ពិសេសត្រូវសាកល្បងផលិតដោយខ្លួនឯង។

ចុងក្រោយនៃកម្មវិធី ឯកឧត្តម សោម សុគន្ធ រដ្ឋមន្រ្តីស្តីទីក្រសួងវប្បធម៌ និងវិចត្រសិល្បៈ ក៏បានលើកទឹកចិត្តថា បើទោះនៅកម្ពុជា យើងមិនទាន់មានសាលាបណ្តុះបណ្តាលខ្សែភាពយន្តក៏ពិតមែន តែយើងមានផលិតករក្មេងចាស់ជាច្រើនកំពុងរួមចំណែកធ្វើឲ្យសិល្បៈតែងនិពន្ធ និងវិស័យភាពយន្តនៅកម្ពុជា កាន់តែមានការរីកចម្រើនឈានឡើង។

ឯកឧត្តម សោម សុគន្ធ បន្តថា៖ «ក្រសួងក៏កំពុងព្យាយាមជួយជ្រោមជ្រែងដល់ផលិតករខ្មែរ តាមរយៈការរៀបគោលការណ៍មួយចំនួន ដូចជាការបង់ពន្ធជាដើម ដើម្បីធ្វើឲ្យការផលិតកុនខ្មែរយើងបានកាន់តែល្អ និងអាចជួយឲ្យកុនខ្មែរមានទីផ្សារផងដែរ»។ តាមការបញ្ជាក់របស់ ឯកឧត្តម ការបង់ពន្ធការផលិតខ្សែភាពយន្តជាការជួយដល់អ្នកផលិតកុនវិញទេ ដើម្បីរដ្ឋមានលទ្ធិភាព និងមានថវិកាគ្រប់គ្រាន់ដើម្បីជួយជ្រោមជ្រែងដល់ផលិតករពេលត្រូវការផលិតខ្សែភាពយន្តនៅក្នុងទឹកដីកម្ពុជាដាដើម។

ចុចអាន៖

-អ្នកនិពន្ធទំនុកចម្រៀងស្រ្តីវ័យក្មេង៣រូប ដែលមានស្នាដៃលេចធ្លោក្នុងផលិតកម្មល្បីៗ

-រឿងបញ្ចាំងថ្ងៃបើកមហោស្រពភាពយន្តជប៉ុនធ្វើឱ្យពលរដ្ឋកម្ពុជានឹកដល់អតីតកាល

-ឱកាសល្អសម្រាប់ផលិតករខ្មែរស្វែងយល់បទពិសោធន៍ពីផលិតករភាពយន្តបរទេសល្បីៗ

អត្ថបទ៖ Sunny