ក្រសួងកិច្ចការនារី និង Kanha ចុះកិច្ចព្រមព្រៀងលើកកម្ពស់ការយល់ដឹងអំពីសមភាពយេនឌ័រ នៅកម្ពុជា
- 2024-04-04 10:02:30
- ចំនួនមតិ 0 | ចំនួនចែករំលែក 0
ក្រសួងកិច្ចការនារី និង Kanha ចុះកិច្ចព្រមព្រៀងលើកកម្ពស់ការយល់ដឹងអំពីសមភាពយេនឌ័រ នៅកម្ពុជា
ចន្លោះមិនឃើញ
រសៀលនៅថ្ងៃទី ០៤ ខែមេសា ឆ្នាំ ២០២៤ មានការរៀបចំនូវពិធីចុះអនុស្សរណៈនៃការយោគយល់គ្នា (MOU) រវាងក្រសួងកិច្ចការនារី និងគេហទំព័រអំពីស្ត្រីដែលមានឈ្មោះថា "កញ្ញា" (Kanha.sabay.com.kh) ដ៏ធំបំផុត របស់មាតិកាឌីជីថល ក្រុមហ៊ុន Sabay Digital Plus ដើម្បីសម្រួច បង្កើនវិសាលភាព លើកកម្ពស់សមធម៌ និងការផ្តល់សិទ្ធិអំណាចដល់ស្ត្រី និង ក្មេងស្រី ក្នុងយុគសម័យឌីជីថល ក្រោមអធិបតីភាពដ៏ខ្ពស់ខ្ពស់របស់លោកជំទាវ គង់ សូរីតា រដ្ឋលេខាធិកាក្រសួងកិច្ចការនារី និងលោក ជី សិលា នាយកប្រតិបត្តិ ក្រុមហ៊ុន Sabay ព្រមទាំងក្រុមការងារពាក់ព័ន្ធ។
នៅក្នុងយុគសម័យឌីជីថលនាពេលបច្ចុប្បន្ននេះ ការពង្រឹងសិទ្ធិអំណាចរបស់ស្ត្រី គឺជាទិដ្ឋភាពសំខាន់នៃវឌ្ឍនភាពសង្គម។ ក្នុងន័យនេះ ក្រសួងកិច្ចការនារី ក៏បានសម្រេចចុះអនុស្សរណៈយោគយល់គ្នា (MOU) ជាមួយ Sabay Digital Plus ដើម្បីសហការក្នុងការលើកកម្ពស់សមធម៌ និងការផ្តល់សិទ្ធិអំណាចដល់ស្ត្រីក្នុងយុគសម័យឌីជីថល។
កិច្ចព្រមព្រៀងនេះ ធ្វើឡើងស្របពេលដែលក្រសួងកិច្ចការនារី ជាសេនាធិការមួយរបស់រាជរដ្ឋាភិបាល ដែលតែងតែផ្ដល់នូវការជំរុញសមភាពយេនឌ័រ និងសិទ្ធិស្ត្រី និង Sabay Digital Plus ដែលមាន អង្គភាពសារព័ត៌មាន កញ្ញា ជាគេហទំព័រដែលបង្កើតនិងផ្ដោតសំខាន់លើស្ត្រី។
សូមបញ្ជាក់ថា តាមរយៈអនុស្សរណៈនៃការយោគយល់គ្នានេះ សារព័ត៌មានកញ្ញា នឹងពង្រីកវិសាលភាពផ្សព្វផ្សាយ បង្កើនការយល់ដឹងលើការលើកកម្ពស់សមភាពយេនឌ័រ បង្កើនភាពអង់អាចដល់ស្រ្តី យល់ដឹងពីសិទ្ធិ តួនាទីស្ត្រីក្នុងការអភិវឌ្ឍសង្គម ជំរុញការអប់រំ ការបង្ការទប់ស្កាត់អំពើហិង្សា ការរំលោភបំពានផ្លូវភេទ ការជួញដូរស្រ្តី និងកុមារ និងការប្រើប្រាស់គ្រឿងញៀនខុសច្បាប់ ផ្ដល់ចំណេះដឹងផ្នែកសុខភាពដ៏ត្រឹមត្រូវ និងការចូលរួមសំខាន់ៗផ្សេងទៀតរបស់ស្ត្រីក្នុង កិច្ចអភិវឌ្ឍសេដ្ឋកិច្ចជាតិ តាមរយៈប្រពន្ធ័ផ្សព្វផ្សាយឌីជីថល។
ជាមួយគ្នានេះ កញ្ញា នឹងពិនិត្យលទ្ធភាពជាក់ស្ដែង ក្នុងការផ្ដល់ការបណ្ដុះបណ្ដាលផ្នែកបច្ចេកទេសប្រព័ន្ធផ្សព្វផ្សាយ ដូចជាការសរសេរព័ត៌មាន ការសរសេរចំណងជើង (caption) លើហ្វេសបុក និងខ្លឹមសារ ក្នុងការផុស ជំនាញនៃការថតរូប ផលិតជាវីដេអូខ្លី និងបទយកការណ៍ ជំនាញសម្ភាសន៍ និងសម្របសម្រួលក្នុងកិច្ចសន្ទនា ដល់មន្រ្តីក្រសួងកិច្ចការនារីផងដែរ៕