Man Utd ល្មើសតំណម២មិនស្តាប់ការណែនាំរបស់ Alex Ferguson
- 2018-12-22 08:40:04
- ចំនួនមតិ 0 | ចំនួនចែករំលែក 0
Man Utd ល្មើសតំណម២មិនស្តាប់ការណែនាំរបស់ Alex Ferguson
ចន្លោះមិនឃើញ
តំណម២ដែល Manchester United មិនព្រមស្តាប់តាមការណែនាំរបស់លោក Sir Alex Ferguson នោះគឺទី១ អតីតគ្រូបង្វឹករូបនេះបានប្រាប់ Man Utd តែងតាំង Ryan Giggs ជាគ្រូបង្វឹក តែក្លឹបបែរជាយកលោក Louis Van Gaal មកធ្វើជាគ្រូបង្គោលទៅវិញ និង ទី២ Ferguson បានរារាំងការតែងតាំង Jose Mourinho ។
The South China Morning Post បានរាយការណ៍ថា Ferguson ជាអ្នកឧទ្ទេសនាម David Moyes ឲ្យបន្តវេនក្រោយលោកចូលនិវត្តន៍កាលពីឆ្នាំ២០១៣ ប៉ុន្តែ Moyes ត្រូវបានបណ្ដេញចេញត្រឹមរយៈពេល៩ខែ លើកុងត្រា៦ឆ្នាំនៅ Old Trafford។ ចាប់ពីពេលនោះមក Ed Woodward ប្រធានក្លឹប Man Utd ហាក់លែងជឿទុកចិត្ត Ferguson។
ក្រោយការបណ្តេញអតីតគ្រូ Everton លោក Woodward និង ម្ចាស់ក្លឹបនៃគ្រួសារ Glazer បានតែងតាំង Giggs ជាគ្រូបង្វឹកបណ្តោះអាសន្ន។ កាលណោះ អតីតគ្រូបង្វឹកដែលធ្លាប់ជួយ Man Utd ឈ្នះពាន Premier League ១៣សម័យកាលបានប្រាប់ Woodward ឲ្យតែងតាំង Giggs ជាគ្រូអចិន្ត្រៃយ៍ ប៉ុន្តែប្រធានក្លឹបមិនព្រមធ្វើតាមឡើយ ហើយបែរជាយកលោក Van Gaal ដែលមានបទពិសោធន៍ជាងមកដឹកនាំក្លឹប ហើយ Giggs ជាជំនួយការ។
ជាថ្មីម្តងទៀត Woodward ហាក់ប្រងើយកន្តើយនឹងការព្រមានរបស់ Ferguson ចំពោះការតែងតាំង Mourinho ក្រោយក្លឹបបណ្តេញ Van Gaal ចេញ។
គ្រូតា Ferguson រារាំងការតែងតាំងគ្រូបង្វឹកព័រទុយហ្គាល់មិនមែនមកពីគិតថា Mourinho គ្មានសមត្ថភាពនោះទេ ប៉ុន្តែលោកប្រហែលជាគិតថារបៀបធ្វើការរបស់ ប្រធានក្លឹបដ៏មានឥទ្ធិពលខាងលើ និង របៀបធ្វើការរបស់ The Special One នឹងមិនស្របគ្នាឡើយ។
ក្រោយការចាកចេញពីតំណែងរបស់លោក David Gill ដែលជានាយកប្រតិបត្តិកាលពីឆ្នាំ ២០១៣ Woodward បានឡើងជាអនុប្រធានប្រតិបត្តិ ហើយគ្រប់គ្រងក្លឹបបិសាចក្រហមតាមបែបមិនបើកទូលាយដូច David Gill ឡើយ ពោលគឺបើលោកមិនចង់បានកីឡាករណាហើយ គ្រូបង្វឹកក៏ពិបាកនឹងបញ្ចុះបញ្ចូលលោកដែរ។
David Gill អាចថាជាមេល្អរបស់ Ferguson ក៏បាន ឬ ថាជាមិត្តល្អរបស់អតីតគ្រូបង្វឹកសញ្ជតិស្កុតឡែនក៏បាន ពីព្រោះ កាលជំនាន់លោកទាំង២ធ្វើការគឺចុះសម្រុងនឹងគ្នាល្អណាស់ បើ Ferguson ចង់បានកីឡាករណាហើយ លោកគ្រាន់តែឲ្យបញ្ជីឈ្មោះទៅក្រុមប្រឹក្សារបស់ក្លឹប នោះ David Gill ដែលធ្លាប់ចូលមកកាន់ការងារដំបូងៗនៅ Man Utd ក្នុងនាមជានាយកហិរញ្ញវត្ថុទម្រាំឡើងជាប្រធានក្លឹប ហើយក៏ជាមនុស្សដែលមានជំនាញចាយលុយដ៏មានប្រសិទ្ធភាព លោកអាចជួយទិញកីឡាករឲ្យ Ferguson បានល្អៗហើយថោក។
ដោយឡែក Mourinho ធ្លាប់បាននិយាយថា Man Utd មិនអាចប្រជែងនឹង Man City ឡើយព្រោះ Pep Guardiola មានលុយទិញកីឡាករណាដែលលោកចង់បាន។
កាលពីថ្ងៃសុក្រ Roy Kean អតីតខ្សែបម្រើបិសាចក្រហមបានរិះគន់កីឡាករក្នុងក្លឹបធ្វើស៊ីគ្រូបង្វឹក និង ជាដើមចមដែលឈានទៅដល់ការបណ្ដេញលោក Mourinho ចេញពីតំណែង។
នៅពេលនេះ Woodward ប្រហែលជាគ្មានជម្រើសអ្វីក្រៅពីត្រូវការជំនួយនិងការណែនាំរបស់ Ferguson ។ Solskjaer ជាគ្រូបង្វឹកទី៥ហើយក្រោមការសម្រេចចិត្តតែងតាំងនិងបណ្ដេញចេញរបស់ប្រធានក្លឹបថ្មីរូបនេះ ហើយប្រសិនបើ Solskjaer ក្នុងនាមជាគ្រូបង្វឹកបណ្ដោះអាសន្នដឹកនាំមិនបានល្អ នោះវត្តមានគ្រូបង្វឹកទី៦នឹងលេចរូបរាងឡើងក្នុងរយៈពេល៥ឆ្នាំចុងក្រោយនេះ បន្ទាប់ពី Ferguson ចូលនិវត្តន៍។
ជារួម វិបត្តិប្រធានក្លឹបថ្មី ការតែងតាំងនិងបណ្ដេញចេញរបស់គ្រូបង្វឹកជារៀងរាល់ឆ្នាំ និង ចរិតតួឯករបស់កីឡាករ សុទ្ធសឹងតែជាកត្តាដែលរុញច្រាន Man Utd ឲ្យធ្លាក់ចុះជាបន្តបន្ទាប់នៅប៉ុន្មានឆ្នាំចុងក្រោយនេះ៕