ដើម្បីកូន! អត់លុយចូលពេទ្យ ក៏ប្រឹងព្យាបាលតាមបែបបុរាណ
- 2014-11-27 00:17:18
- ចំនួនមតិ 0 | ចំនួនចែករំលែក 0
ដើម្បីកូន! អត់លុយចូលពេទ្យ ក៏ប្រឹងព្យាបាលតាមបែបបុរាណ
ចន្លោះមិនឃើញ
ឪពុកដែលមានសន្តានចិត្តមិនអាចកាត់ថ្លៃម្នាក់នៅប្រទេសចិន បានយកកូនស្រីខ្លួនកំពុងមានជំងឺទៅព្យាបាលដោយការអាំងភ្លើងតាមបែបបុរាណ ព្រោះគ្មានប្រាក់គ្រប់គ្រាន់ដើម្បីចូលមន្ទីរពេទ្យបន្តទៀត។
លោក Wei Shufu ដែលរស់នៅខេត្តយូណាន បានព្យាយាមព្យាបាលកូនស្រីអាយុ ៦ឆ្នាំ ដោយការអាំងផ្សែងភ្លើង ដែលចេញពីការដុតថ្នាំបុរាណច្រើនប្រភេទ។ គ្រួសាររបស់កសិករកម្សត់នេះ បានចំណាយប្រាក់សន្សំអស់ពីខ្លួន ដើម្បីព្យាបាលក្មេងស្រី ដែលមានជំងឺមហារីកគ្រាប់ឈាម (ឈាមសស៊ីឈាមក្រហម) កាលពីខែតុលា ឆ្នាំមុន។
ទោះចំណាយប្រាក់ច្រើនបែបនេះក្ដី លោកនៅតែមិនឃើញស្ថានភាពជំងឺរបស់កូន មានភាពល្អប្រសើរឡើយ។ ក្រោយមក លោកបានបញ្ជូនកូនស្រីទៅមន្ទីរពេទ្យធំជាងមុន នាខេត្តក្វាងចូវ ភាគខាងត្បូងប្រទេសចិន ដើម្បីស្វែងរកការព្យាបាលបន្ត។ វេជ្ជបណ្ឌិតនៅទីនោះ បានណែនាំថា នាងត្រូវទទួលការវះកាត់ផ្លាស់ប្ដូរខួរឆ្អឹង ទើបអាចជួយសង្គ្រោះជីវិតបាន។ ទោះយ៉ាងណា ការវះកាត់មានតម្លៃដល់ទៅជិត ៥ម៉ឺនដុល្លារ ដែលជាទឹកប្រាក់ដ៏មហាសាលសម្រាប់គ្រួសារកសិករជនបទមានចំណូលប្រចាំឆ្នាំតិចជាង ៧០០ដុល្លារដូចជាលោក។
ក្រោយពីអស់សង្ឃឹមក្នុងការព្យាបាលតាមបែបវិទ្យាសាស្ត្រ លោកបានងាកមកប្រើវិធីបុរាណ តាមការណែនាំពីអ្នកជំងឺម្នាក់ ដែលលោកបានជួបនៅមន្ទីរពេទ្យ។ លោកបាន ប្រើថ្នាំបុរាណជាច្រើនប្រភេទដើម្បីដុតចេញជាផ្សែង រួចឲ្យកូនស្រីដេកអាំងលើផ្សែងនោះ។
រូបថតសកម្មភាពដ៏គួរឲ្យរំជួលចិត្តនេះ បានទាក់ទាញចំណាប់អារម្មណ៍នៅលើបណ្ដាញសង្គមយ៉ាងខ្លាំង ហើយរហូតមកដល់ពេលនេះមូលនិធិ Beijing AngelMom ប្រមូលបានប្រាក់ជិត ២ពាន់ដុល្លារ ដើម្បីជួយក្មេងស្រីនេះ៕
ចុចអាន៖ រំជួលចិត្ត! បុរសស្មោះស្នេហ៍សុខចិត្តរៀបការជាមួយកូនក្រមុំកើតមហារីកជិតស្លាប់
ប្រែសម្រួល៖ គង់ វិសាល
ប្រភព៖ dailymai