លះបង់ជិត២ម៉ឺនដុល្លារ សាកលវិទ្យាល័យធំមួយលុបចោលថ្លៃផ្ញើកង់ពីនិស្សិត

2015-01-03 19:25:12
ចំនួនមតិ 0 | ចំនួនចែករំលែក 0

ចន្លោះមិនឃើញ

អាចជាសាកលវិទ្យាល័យដំបូងបង្អស់នៅរាជធានីភ្នំពេញ សាកលវិទ្យាល័យភូមិន្ទភ្នំពេញ បានប្រកាសលុបចោល ការយកថ្លៃផ្ញើកង់ ពីសិស្ស-និស្សិត ដែលជាវិធានការមួយរួមចំណែក កាត់បន្ថយការបំពុលបរិស្ថាន និងការចំណាយដល់និស្សិត។

លោក ងន់ ម័រ អនុប្រធានមជ្ឈមណ្ឌលបច្ចេកវិទ្យាព័ត៌មាន និងជាអ្នកទទួលបន្ទុកសេវាកម្មចំណតយានយន្ត នៃសាកលវិទ្យាល័យភូមិន្ទភ្នំពេញ បានប្រាប់ Sabay ថា គោលការណ៍នេះនឹងត្រូវអនុវត្តចាប់ពីថ្ងៃទី១ ខែមករា ឆ្នាំ២០១៥ នេះតទៅ ដើម្បីលើកទឹកចិត្តដល់និស្សិតឲ្យប្រើប្រាស់កង់បានច្រើនជាងម៉ូតូ-ឡាន ដែលនាំឲ្យមានការបំពុលដល់បរិស្ថាន ក៏ដូចការចំណាយរបស់និស្សិតក្រីក្រ មកពីទីជនបទ។ លោកថា គណៈគ្រប់គ្រងសាកលវិទ្យាល័យបានប្រជុំ និងសម្រេចលុបចោលការយកថ្លៃផ្ញើកង់ នេះដោយមិនគិតដល់ការខាតបង់ថវិកា ដែលមានប្រមាណ ១៨.០០០ ដុល្លារ ក្នុងមួយឆ្នាំ។ "និស្សិតចំនួន២៥ % បានប្រើប្រាស់កង់ជាជំនិះរៀងរាល់ថ្ងៃ។ ដូច្នេះនេះគឺជាលះបង់មួយរបស់សាកលវិទ្យាល័យ ដើម្បីបរិស្ថាន និងការចំណាយរបស់និស្សិតក្រីក្រពីជនបទ”។ លោក ងន់ ម័រ បន្ថែម។

កាលពីម្សិលមិញ និស្សិតមួយចំនួន បានយកកង់ទៅផ្ញើមានអារម្មណ៍រីករាយ ដែលសាកលវិទ្យាល័យបានលុបចោលការយកថ្លៃផ្ញើ ដោយកឹបសំបុត្រឲ្យធម្មតា។ នេះបើតាមលោក ងន់ ម័រ។ លោកថា ពីមុនសាលាបានយកថ្លៃ ២០០ រៀល សម្រាប់កង់មួយគ្រឿង ខណៈជាមធ្យមមានកង់ប្រមាណ ១៥០០ យកទៅផ្ញើនៅចំណតរបស់សាកលវិទ្យាល័យសម្រាប់ថ្ងៃរៀនធម្មតា៕