រឿងពិតពីក្រោយរូបថតឪពុកពកូនយំ ឆក់យកបេះដូងមនុស្សទូទាំងពិភពលោក
- 2015-08-20 21:40:13
- ចំនួនមតិ 0 | ចំនួនចែករំលែក 0
រឿងពិតពីក្រោយរូបថតឪពុកពកូនយំ ឆក់យកបេះដូងមនុស្សទូទាំងពិភពលោក
ចន្លោះមិនឃើញ
រូបភាពដ៏មានអត្ថន័យមួយសន្លឹក បង្ហាញពីទឹកចិត្តឪពុកប្រើដៃម្ខាងពកូនស្រី ឯដៃម្ខាងទៀតឱបកកូនប្រុសយំ កំពុងធ្វើឲ្យរំជួលចិត្តមនុស្សជាច្រើនទូទាំងពិភពលោក រហូតអ្នកខ្លះស្រក់ទឹកភ្នែកតាម។
ឪពុកដ៏កម្សត់នៅក្នុងរូបមានឈ្មោះ Laith Majid ជាជនភៀសខ្លួនស៊ីរី ដែលរត់រកកន្លែងជ្រកកោនក្នុងប្រទេសក្រិក គេចពីក្រុមរដ្ឋឥស្លាមជ្រុលនិយម។ បុរសចំណាស់ម្នាក់នេះ បានចូលដល់កោះ Dodecanese តាមរយៈការឆ្លងកាត់ប្រទេសទួរគី បន្ទាប់ពីផ្ទះក្នុងក្រុង Deir ez-Zor ប្រទេសកំណើត ត្រូវគ្រាប់បែកបំផ្លាញរាបដល់ដី។
លោក Majid បានជិះលើទូកមួយផ្សងព្រេងជាមួយប្រពន្ធ (គ្រូបង្រៀនភាសាអង់គ្លេស) កូនប្រុសបីនាក់ និងកូនស្រីម្នាក់ទៀតតាមមហាសមុទ្រដ៏ធំល្វឹងល្វើយ។ គ្រួសារដ៏ធំមួយនេះ ត្រូវចំណាយប្រាក់ជាប់ខ្លួនជាង ៨០០០ដុល្លារ សម្រាប់ការធ្វើដំណើររយៈពេល ២ម៉ោង បន្ទាប់ពីឆ្លងកាត់ក្រុង Bodrum ប្រទេសទួរគី។ ម៉ោង ៤:៣០នាទីទៀបភ្លឺ ឪពុកម្ដាយដ៏កម្សត់ រួមទាំងកូនបួននាក់បានធ្វើដំណើរដល់កោះ Dodecanese ដែលធ្វើឲ្យពួកគេរំភើបយ៉ាងខ្លាំង។
អ្នកថតរូបឈ្មោះ Daniel Etter ដែលផ្ដិតយកទិដ្ឋភាពខ្លោចចិត្តបញ្ជាក់ថា គ្រួសារស៊ីរីនេះយល់ព្រមធ្វើដំណើរដោយគ្រោះថ្នាក់មកកាន់កោះ។ អ្នកថតរូបបាននិយាយថា៖ "ទូកនេះមានមនុស្ស ១២នាក់ បើទោះបីជាវាតូច និងអាចដាក់មនុស្សបានត្រឹម ៣ ៤នាក់ក្ដី"។
លោកបានបន្តទៀតថា៖ "ជាងពីរម៉ោងក្រោយពេលចេញដំណើរ ទូកនោះលែងមានខ្យល់ ហើយទឹកចាប់ផ្ដើមហូរចូល... ជនភៀសខ្លួនទាំងអស់ ត្រូវទទឹកជោគខ្លួនមុនពេលដល់ឆ្នេរ។ ពួកគេបានធូរស្បើយចិត្ត ពេលមកដល់ដោយសុវត្ថិភាព"។
ពុះពារកាត់ព្យុះភ្លៀងតាមសមុទ្រ ឪពុកបានពកូនស្រី និងឱបកកូនប្រុសយំ ដោយសាររំភើបផុតគ្រោះថ្នាក់ជាថ្មី ប៉ុន្តែកូនស្រីបានគ្រុនក្ដៅខ្លាំងបន្ទាប់ពីធ្វើដំណើរ ឯកូនប្រុសវិញមិនអាចគេងលក់។ យ៉ាងណាក្ដី នេះមិនមែនជាដំណើរចុងក្រោយដល់ត្រើយសុខសាន្តទេ ព្រោះគ្រួសារនេះសង្ឃឹមថាអាចតាំងទីលំនៅផ្ញើខ្លួនក្នុងប្រទេសអាល្លឺម៉ង់។
អ្នកថតរូបបាននិយាយថា លោកមិនធ្លាប់រំជួលចិត្តដោយសាររូបថតមួយសន្លឹកបែបនេះពីមុនមកទេ។ លោកតែងស្រក់ទឹកភ្នែក ម្ដងហើយម្ដងទៀត ពេលទាញរូបថតមកមើលជាថ្មី។ ហើយពិភពលោកទាំងមូលក៏រំជួលចិត្តចំពោះរូបនេះដែរ ដោយមានការចែកចាយរាប់ពាន់ដងតាមបណ្ដាញសង្គម៕
ចុចអាន៖ មួយសន្លឹកខ្លោចចិត្ត! ក្មេងអនាថាធ្វើកិច្ចការសាលាក្រោមពន្លឺភ្លើងភោជនីយដ្ឋាន
ចុចអាន៖ ម្ចាស់ភោជនីយដ្ឋានវាយក្មេងប្រុសលក់ក្រដាសជូតមាត់ល្បីដល់នាយករដ្ឋមន្ត្រីទួរគី
ចុចអាន៖ ភ្លើងសង្គ្រាមនៅស៊ីរី ធ្វើឲ្យក្មេងតូចម្នាក់ខ្លាចកាមេរ៉ាព្រោះគិតថាជាកាំភ្លើង
ប្រែសម្រួល៖ គង់ វិសាល ប្រភព៖ news.com