តាអាយុ៨៥ឆ្នាំ ជួបគូស្នេហ៍វិញ ក្រោយបែកគ្នា៥៨ឆ្នាំ ដោយការយល់ច្រឡំ
- 2015-10-26 17:07:20
- ចំនួនមតិ 0 | ចំនួនចែករំលែក 0
តាអាយុ៨៥ឆ្នាំ ជួបគូស្នេហ៍វិញ ក្រោយបែកគ្នា៥៨ឆ្នាំ ដោយការយល់ច្រឡំ
ចន្លោះមិនឃើញ
លោកតាជនជាតិចិន វ័យ ៨៥ឆ្នាំម្នាក់ បានជួបគូស្នេហ៍ដំបូងរបស់ខ្លួនវិញ ក្រោយបែកគ្នាអស់រយៈពេល៥៨ឆ្នាំ។ លោកតាឈ្មោះ Li Dazhong ឯលោកយាយឈ្មោះ Chen Shimeng អាយុ ៨៣ឆ្នាំ នៅទីក្រុងចេងឌូ ខេត្តស៊ីឈួន ភាគនិរតីប្រទេសចិន។ ក្រោយការជួបជាថ្មីនេះ លោកតាបានស្នាក់នៅជាមួយលោកយាយ ដើម្បីមើលថែលោកយាយ ដែលតាបានធ្វើឲ្យខកចិត្តកាលនៅកំលោះ។ គិតមកទល់ពេលនេះអ្នកទាំងពីរបានរួមរស់ជាមួយគ្នារយៈពេល ៤ឆ្នាំហើយ។
យ៉ាងណាក្ដី រឿងរ៉ាវស្នេហាមិនគួរឲ្យជឿនេះ ទើបលេចក្នុងបណ្ដាញព័ត៌មានប៉ុណ្ណោះ ក្រោយពួកគាត់ បាននៅកន្លែងបោះពុម្ពកាសែត West China Metropolis Daily កាលពីសប្ដាហ៍មុន ដោយរំលឹកអនុស្សាវរីយ៍ចាស់ៗ។
បើយោងតាមកាសែតនេះ ពួកគាត់បានបែកគ្នាតាំងពីឆ្នាំ ១៩៥០ ដោយសារការយល់ច្រឡំលើគ្នាបន្តិចបន្តួច មុនពេលពួកគាត់ហ៊ានសារភាពស្រឡាញ់គ្នា។
លោកតា Li បានរំលឹកថាពេលនោះពួកគាត់ជាអ្នកភូមិផងរបងជាមួយ នៅទីក្រុង Nanchong។ ពេលតាបានលង់ស្រលាញ់លោកយាយ នៅអាយុប្រហែល ២០ឆ្នាំ ប៉ុន្តែបានកើតអារម្មណ៍យល់ច្រឡំ ដោយសារតែលោកយាយបាននិយាយលេងច្រើនជាមួយមិត្តរួមការងារម្នាក់ទៀត ជំនួសលោកតា នៅពេលយាយចូលបន្ទប់ធ្វើការពេលនោះ។
ក្រៅពីការប្រចណ្ឌ លោកតាបានចាកចេញពីទីក្រុងទៅបន្តការសិក្សាក្នុងសាកលវិទ្យាល័យមួយនៅទីក្រុងក្បែរខាង គឺនៅក្រុង Chongqing ដោយមិនបានទុកសារអ្វីទាល់តែសោះចំពោះលោកយាយ។
ចំណែកលោកយាយរំលឹកដែរថា៖ «តាបានសរសេរលិខិតមួយច្បាប់ ពេលគាត់បានបញ្ចប់ការសិក្សា។ តាត្រូវបានគេតែងតាំងឲ្យទៅធ្វើការនៅភាគឦសានប្រទេស និងសង្ឃឹមថាខ្ញុំអាចឃើញគាត់ជាលើកចុងក្រោយពេលគាត់ចាកចេញទៅ»។ យ៉ាងណាក្ដី លោកយាយបានបដិសេធមិនព្រមជួប ព្រោះនៅខឹងថាតា ដែលទៅរៀនសាកលវិទ្យាល័យដោយមិនប្រាប់យាយមួយម៉ាត់សោះ។
ជាច្រើនឆ្នាំកន្លងទៅ អ្នកទាំងពីរបានផ្ដើមជីវិតថ្មីរៀងៗខ្លួនក្នុងទីក្រុងពីរផ្សេងគ្នា ចម្ងាយជាច្រើនគីឡូម៉ែត្រពីគ្នា។
តាបានយកប្រពន្ធនៅទីក្រុងនោះ តែប្រពន្ធបានស្លាប់ក្នុងឆ្នាំ ២០១១ ហើយគាត់ក៏បានសម្រេចចិត្តត្រឡប់មកស្រុកកំណើតនៅខេត្តស៊ីឈួនវិញ ដោយបានជួបមិត្តភ័ក្ដិចាស់ៗ មានទាំងចៅប្រុសម្នាក់ផង។ ប៉ុន្តែតាមិនបានឃើញលោកយាយ Chen រស់នៅទីនោះទេ ពេលនោះអនុស្សាវរីយ៍ចាស់ៗជាមួយយាយ បានផុសចាក់ស្រោចក្នុងចិត្តលោកតាតែម្ដង។
ដូច្នេះតាបានចាប់ផ្ដើមធ្វើដំណើរស្វែងរកលោកយាយ ដោយសាកសួរពីមិត្តចាស់ៗ និងបានរកឃើញយាយតែម្ដង ដែលកំពុងឈឺ និងរស់នៅតែម្នាក់ឯង។
លោកតាបានសម្រេចស្នាក់នៅក្នុងក្រុងចេងឌូ ដើម្បីមានពេលមើលថែយាយ ក្រោយសមាជិកគ្រួសារតាស្លាប់អស់។ អ្នកទាំងពីរបានរួមរស់ជាមួយគ្នាតាំងពីពេលនោះមក៕
ចុចអាន៖ រំភើបចិត្ត! លោកតាឈរកាន់បាច់ផ្កា ទទួលលោកយាយនៅព្រលានយន្តហោះ
ប្រែសម្រួល៖ ឡេង ភារុណ ប្រភព៖ CCTV