ថៃសម្រេចហាមឃាត់ការផ្សព្វផ្សាយម្សៅទឹកដោះគោទារកហើយ ក្រោមហេតុផលនេះ

2017-09-08 09:47:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ច្បាប់ហាមឃាត់ការផ្សព្វផ្សាយម្សៅទឹកដោះគោ ព្រមជាមួយផលិតផលផ្សេងៗសម្រាប់ទារក និងកុមារបានចូលជាធរមានហើយនៅថ្ងៃទី ៨កញ្ញា ឆ្នាំ ២០១៧។ នេះបើតាមការចុះផ្សាយរបស់សារព័ត៌មានថៃ ThaiPBS។

ច្បាប់ថ្មីនេះត្រូវគេជឿថា នឹងអាចជួយការពារអតិថិជនជាទារក និងក្រុមកុមារតូចៗឲ្យងាកមកបំបៅដោះម្ដាយវិញ ព្រោះមានសារជាតិជាច្រើនសម្រាប់សុខភាពទារក។

ការហាមឃាត់សកម្មភាពផ្សព្វផ្សាយនេះមានដូចជា ឲ្យប័ណ្ណបញ្ចុះតម្លៃ ការថែមជូនពិសេស ផ្ដល់កាដូ និងរង្វាន់ជាដើម ដែលក្រុមហ៊ុនប្រើសម្រាប់ទាក់ទាញអតិថិជនឲ្យទិញ។ ចំណែកបុគ្គលិកពេទ្យនានានឹងចូលរួមលើកកម្ពស់ និងការពារការបំបៅទឹកដោះម្ដាយឲ្យបានកាន់តែច្រើន។

ច្បាប់ខាងលើបានគ្រប់គ្រងលើការផ្សព្វផ្សាយម្សៅទឹកដោះគោ និងផលិតផលចំណីអាហារសម្រាប់ទារកទើបកើត ដល់អាយុ ១២ខែ និងកុមារអាយុ ១២ខែដល់ ៣ឆ្នាំ។ ក្រុមអ្នកផលិត អ្នកនាំចូល និងអ្នកលក់ទាំងអស់ត្រូវបានហាមឃាត់ដាច់ខាតដូចជា៖

ផ្សព្វផ្សាយផលិតផលអាហារសម្រាប់កុមារ ដែលធ្វើឲ្យឪពុកម្ដាយរបស់ក្មេងយល់ថា ម្សៅទឹកដោះគោ ឬផលិតផលទាំងនោះល្អសម្រាប់សុខភាព។
ផ្ដល់ប័ណ្ណបញ្ចុះតម្លៃ ថែមជូនពិសេស កាដូ ប្រាក់ ឬរង្វាន់ដោយផ្ទាល់ ឬប្រយោល។
រៀបចំប្រជុំ បណ្ដុះបណ្ដាល ឬសិក្ខាសាលាពាក់ព័ន្ធនឹងចំណីអាហារទារកសម្រាប់ភ្នាក់ងារសេវាសុខភាពសាធារណៈ។
បរិច្ចាគចំណីអាហារឲ្យទារក ឬកុមារ លើកលែងតែករណីកុមារកើតជំងឺ ឬមានភាពមិនប្រក្រតីពីកំណើត។

ករណីអ្នកបំពានច្បាប់ខាងលើ ប្រឈមនឹងជាប់ពន្ធនាគាររហូតដល់មួយឆ្នាំ និង/ឬ បង់ពិន័យជាង ៣ ០០០ដុល្លារអាមេរិកទៀតផង។ ច្បាប់នេះត្រូវអ្នកជំនាញអះអាងថា ថៃស្ថិតក្នុងចំណោមប្រទេស ១៣៥ទៀតនៅលើលោកក្នុងការការពារការបំបៅទឹកដោះម្ដាយ៕

ចុចអាន៖

ប្រភព៖ Thai PBS ប្រែសម្រួល៖ ឡេង ភារុណ