Gareth Bale នឹងអវត្តមានក្នុងការប្រកួតបាល់ទាត់អន្តរជាតិខាងមុខនេះ

2017-10-03 12:08:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធស្លាប Gareth Bale នឹងមិនបានជួយក្រុមជម្រើសជាតិវេល ក្នុងការប្រកួតវគ្គជម្រុះ World Cup ក្នុងសប្ដាហ៍នេះទេ ដោយសារបញ្ហារបួសសាច់ដុំ។

បើតាមសារផ្លូវការរបស់សហព័ន្ធបាល់ទាត់វេល ចេញកាលពីពេលថ្មីៗនេះ បានឲ្យដឹងថា៖ "យើងអាចបញ្ជាក់បានថា Gareth Bale នឹងអវត្តមានក្នុងការប្រកួតវគ្គជម្រុះ World Cup ជាមួយប្រទេស Georgia និងសាធារណរដ្ឋអៀរឡង់ដែលនឹងប្រព្រឹត្តនាពេលឆាប់ៗខាងមុខនេះ"។

សហព័ន្ធបាល់ទាត់ប្រទេសនេះ ក៏បានបន្ថែមទៀតថា មូលហេតុដែលនាំឲ្យមានអវត្តមាននៃកីឡាករវ័យ ២៨ឆ្នាំរូបនេះ គឺបណ្ដាលមកពីបញ្ហារបួស ហើយបើតាមសារព័ត៌មាន The Sun បានឲ្យដឹងថារបួសនេះជារបួសសាច់ដុំ។

Gareth Bale បានបង្ហាញទម្រង់លេងយ៉ាងល្អក្នុងការប្រកួតក្របខ័ណ្ឌ Champions League កាលពីសប្ដាហ៍មុនដោយ ខ្សែប្រយុទ្ធល្បឿនលឿនរូបនេះបានស៊ុតចូល ១គ្រាប់ជួយឲ្យក្លឹប Real Madrid យកឈ្នះ Dortmund ក្នុងលទ្ធផល ៣ទល់នឹង ១។ តែតាំងពីពេលនោះមក Bale បានអាក់ខានមិនបានលេងក្នុងការប្រកួតក្រោយមកទៀត ដោយសារបញ្ហារបួស៕