អាទិភាព២ម្ចាស់ថ្មីត្រូវដោះស្រាយធ្វើឲ្យកីឡាករបឹងកេតពេញចិត្តស្នូក
- 2018-05-02 02:37:58
- ចំនួនមតិ 0 | ចំនួនចែករំលែក 0
អាទិភាព២ម្ចាស់ថ្មីត្រូវដោះស្រាយធ្វើឲ្យកីឡាករបឹងកេតពេញចិត្តស្នូក
ចន្លោះមិនឃើញ
កាលពីល្ងាចមិញ បឹងកេតបានបង្ហាញជាសាធារណៈអំពីម្ចាស់ភាគហ៊ុនធំថ្មីសម្រាប់ការដំណើរការក្លឹប និងអភិវឌ្ឍបន្តទៅមុខទៀត បន្ទាប់ពីម្ចាស់ក្លឹបចាស់ដែលជាថៅកែកៅស៊ូបឹងកេតបានដកខ្លួនតាំងពីដើមរដូវកាល២០១៨។
ម្ចាស់ភាគហ៊ុនធំថ្មីគឺ លោកស្រី ពុទ្ធ ធីតា និងស្វាមីជាជនជាតិថៃ ព្រមទាំងមានភាគហ៊ុនតូចៗមួយចំនួនទៀត។ នៅចំពោះមុខកីឡាករបឹងកេត និងអ្នកសារព័ត៌មាន អ្នកស្រីបានប្រកាសថា តម្រូវការចាំបាច់ពីរយ៉ាងនៅចំពោះមុខដែលលោកស្រីត្រូវធ្វើគឺកីឡដ្ឋាន និងធានារ៉ាប់រង់ដល់ក្រុមបឹងកេតទាំងមូល។
អាទិភាពទី១
លោកស្រី ពុទ្ធ ធីតា ដែលជាស្ត្រីដំបូងដឹកនាំក្លឹបបាល់ទាត់នៅប្រទេសកម្ពុជាបានប្រាប់អ្នកសារព័ត៌មានថា អ្វីដែលជាចាំបាច់សម្រាប់ក្លឹបនៅពេលនេះគឺកីឡដ្ឋាន។ លោកស្រីបានត្រៀមថវិកាប្រមាណ១,៥លានដុល្លារអាមេរិកសម្រាប់កសាងកីឡដ្ឋាន។ នៅពេលនេះលោកស្រីបានសម្លឹងឃើញដីពីរកន្លែងដែលមួយកន្លែងនៅភ្នំពេញ និងមួយកន្លែងទៀតនៅខេត្ត។ លោកស្រីកំពុងពិភាក្សាជាមួយក្រុមការងារដើម្បីសម្រេចចិត្តថាតើជ្រើសរើសយកមួយណា។
លោកស្រីបន្តថា ដីនោះមានទំហំ២ហិកតារគ្រប់គ្រាន់សម្រាប់កសាងកីឡដ្ឋានមួយដែលមានស្តង់ដារ។ លោកស្រីមិនបានបញ្ជាក់លំអិតពីកម្រិតស្តង់ដារយ៉ាងណានោះទេ ប៉ុន្តែតាមអ្វីដែលលោកស្រីចង់បានគឺទីលានសម្រាប់ប្រើប្រាស់ផ្លូវការ ទីលានសម្រាប់ហ្វឹកហាត់ កន្លែងស្នាក់នៅសម្រាប់កីឡាករថ្នាលយុវជន កន្លែងហាត់ប្រាណជាដើម។ លោកស្រីបានបញ្ជាក់ថា គម្រោងកសាងកីឡដ្ឋាននេះគឺឲ្យរួចរាល់ក្នុងរយៈពេលយ៉ាងយូរ២ឆ្នាំខាងមុខ។
អាទិភាពទី២
ម្តាយកុមារា Kasidef Vasunan ដែលបានទៅហ្វឹកហាត់នៅសាលាបាល់ទាត់ Barcelona ប្រទេសអេស្ប៉ាញមួយសប្តាហ៍បានប្រកាសនៅចំពោះមុខកីឡាករថា លោកស្រីនឹងរៀបចំធានារ៉ាប់រងដល់កីឡាករ និងក្រុមការងារបឹងកេតទាំងអស់។ ធានារ៉ាប់រងសម្រាប់កីឡាករដែលបានបញ្ហាគ្រោះថ្នាក់ បញ្ហាសុខភាព និង ធានារ៉ាប់រងសម្រាប់កីឡាករដែលលេងបាល់ទាត់លែងកើតដើម។
លោកស្រី ពុទ្ធ ធិតាបន្ថែមថា ដោយសារអ្នកស្រីជាអ្នកជំនួញដែលមានក្រុមហ៊ុនរកស៊ីច្រើន ដូច្នេះកីឡាករដែលលេងបាល់ទាត់មិនកើត អាចនឹងទទួលបានការងារធ្វើនៅក្រុមហ៊ុនរបស់លោកស្រីក៏ថាបាន។
ទន្ទឹមជាមួយនឹងការប្រកាសអាទិភាពពីរដែលត្រូវដោះស្រាយនៅចំពោះមុខ លោកស្រី ពុទ្ធ ធីតាក៏បានបញ្ជាក់ប្រាប់ក្រុមកីឡាករថា សូមកុំគិតថា លោកស្រីជាម្ចាស់ថ្មី ប៉ុន្តែជាអ្នកដែលចូលរួមអភិវឌ្ឍក្លឹបតែប៉ុណ្ណោះ។ អ្វីៗដែលបឹងកេតមានសព្វថ្ងៃនេះគឺនៅរក្សាទាំងអស់គ្មានអ្វីប្រែប្រួលឡើយ។
សូមបញ្ជាក់ថា ចាប់ពីដើមរដូវកាលមកម្ចាស់ក្លឹបចាស់បានសម្រេចចិត្តដកខ្លួនដែលធ្វើឲ្យក្លឹបជួបការលំបាកខ្វះថវិកាសម្រាប់ទ្រទ្រង់ក្លឹប បើទោះជាទទួលបានប្រាក់ពីម្ចាស់ឧបត្ថម្ភ១០ម៉ឺនដុល្លារក៏ដោយ។ ប្រការនេះបានធ្វើឲ្យលោក បែ មករា អ្នកចាត់ការក្លឹបដែលទទួលបន្ទុកដោះស្រាយទាំងស្រុងដេកមិនលក់ បក់មិនល្ហើយដោយខ្វាយខ្វល់គ្រប់ពេលវេលាអស់រយៈពេលជាច្រើនខែ។ យ៉ាងណា ពេលនេះលោកធូរទ្រូងហើយ៕