ខ្លីៗព្រឹត្តិការណ៍អន្តរជាតិគួរឲ្យចាប់អារម្មណ៍សប្ដាហ៍មុន

2014-10-20 17:29:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រៅពីសង្គ្រាមប្រឆាំងពួកឧទ្ទាមជ្រុលនិយមរដ្ឋអ៊ីស្លាម ពិភពលោកទាំងមូលកំពុងមានវិបត្តិដ៏ធំមួយទៀត គឺប្រឈមមុខនឹងមេរោគអេបូឡា។ សហរដ្ឋអាមេរិក ក៏កំពុងឈឺក្បាលខ្លាំងណាស់ដែរដោយសារមេរោគមរណៈមួយនេះ ហើយក្រៅពីនេះនៅមានព្រឹត្តិការណ៍អន្តរជាតិសំខាន់ៗមួយចំនួនទៀត។ ខាងក្រោមនេះ គឺជាវិវឌ្ឍន៍ថ្មីៗនៃព្រឹត្តិការណ៍អន្តរជាតិគួរឲ្យចាប់អារម្មណ៍កាលពីសប្ដាហ៍មុន។

១. ការរីករាលដាលនៃមេរោគមរណៈអេបូឡា

(១៩ តុលា ២០១៤) អេបូឡា កំពុងរីករាលដាលយ៉ាងខ្លាំងនៅតំបន់អាហ្វ្រិកខាងលិច ជាពិសេសគឺក្នុងប្រទេសលីបេរីយា។ ស្ថិតិចុងក្រោយបង្ហាញថា អ្នកស្លាប់ដោយអេបូឡាក្នុងឆ្នាំ២០១៤ នេះ បានកើនលើសពី ៤៥០០នាក់ហើយ ដោយក្នុងនោះលីបេរីយ៉ាមាន ២២០០នាក់។ ចំណែកឯនៅអាមេរិកវិញ គិលានុបដ្ឋាយិកាវៀតណាម-អាមេរិកម្នាក់ទៀត ត្រូវគេរកឃើញថាមានផ្ទុកជំងឺដ៏កាចសាហាវនេះ និងកំពុងសម្រាកព្យាបាលដាច់ពីគេ។ ងាកមកមើលនៅតំបន់អឺរ៉ុប កាលពីថ្ងៃអង្គារសប្ដាហ៍មុន ជនជាតិស៊ូដង់ម្នាក់ដែលជាមន្ត្រីសុខភាពរបស់អង្គការសហប្រជាជាតិ បានក្លាយជាមនុស្សទីមួយស្លាប់នៅលើទឹកដីអាល្លឺម៉ង់ និងជាជនទី៣ ត្រូវអេបូឡាផ្ដាច់ជីវិតលើទឹកដីអឺរ៉ុប។ (ចុចអានលម្អិត)

៣. វាយប្រហារតាមផ្លូវអាកាស ផ្ដាច់ជីវិតសកម្មជនរដ្ឋអ៊ីស្លាមជាច្រើន

(១៩ តុលា ២០១៤) ប្រមាណមួយសប្ដាហ៍ចុងក្រោយនេះ កងរក្សាសន្តិសុខអ៊ីរ៉ាក់ សហរដ្ឋអាមេរិក និងសម្ព័ន្ធមិត្តនានា បានបើកការវាយប្រហារយ៉ាងខ្លាំងទៅលើកងឧទ្ទាមជ្រុលនិយមរដ្ឋអ៊ីស្លាម។ បើតាមសារព័ត៌មានចិនស៊ិនហួ បានឲ្យដឹងថា កាលពីថ្ងៃពុធកម្លាំងទ័ពអាកាសអ៊ីរ៉ាក់បានបើកការវាយប្រហារយ៉ាងសន្ធាប់ទៅលើទីតាំងនានា និងសម្លាប់ជីវិតពួករដ្ឋអ៊ីស្លាម ៥៩នាក់។ ចំណែកឯរសៀលថ្ងៃសៅរ៍ កងទ័ពអាកាសអាមេរិកបានវាយប្រហារទៅលើទីក្រុង Kobani ភាគខាងជើងស៊ីរី ដោយឆក់យកជីវិតមនុស្សយ៉ាងតិច ៨នាក់ទៀត។ (ប្រភព៖ dailymail)

៣. មហាបាតុកម្មនៅហុងកុងឈានដល់ហិង្សា

(១៩ តុលា ២០១៤) កាលពីថ្ងៃអាទិត្យម្សិលមិញនេះ សកម្មជនគាំទ្រប្រជាធិបតេយ្យនៅហុងកុង បានចោទប្រកាន់ប៉ូលិសថាប្រើកម្លាំងហួសហេតុក្នុងការប៉ះទង្គិចគ្នាដោយហិង្សា។ មនុស្សប្រមាណ ២០នាក់បានរងរបួស ដោយការប៉ះទង្គិចគ្នារវាងបាតុករ និងប៉ូលិសនាយប់ទី៤។ ហេតុការណ៍នេះ បានកើតឡើងបន្ទាប់ពីមានការប្រមូលផ្ដុំគ្នាទាមទារប្រជាធិបតេយ្យពីសំណាក់ក្រុមបាតុកររយៈពេល ៣សប្ដាហ៍កន្លងមក ដោយបិទផ្លូវចេញចូលក្នុងស្រុកដែលសុទ្ធតែជាទីប្រជុំជនធំៗបី។ (ចុចអានលម្អិត)

៤. កូរ៉េខាងជើង និងកូរ៉េខាងត្បូងផ្ទុះអាវុធមួយប្រាវ

(១៩ តុលា ២០១៤) នៅថ្ងៃអាទិត្យម្សិលមិញនេះដែរ កូរ៉េខាងជើង និងកូរ៉េខាងត្បូងបានបាញ់បោះដាក់គ្នាមួយចម្អិនកំពឹសរយៈពេលប្រហែល ១០នាទី នៅតាមបណ្ដោយព្រំដែន ប៉ុន្តែមិនមានរបាយការណ៍ពីការខូចខាត និងជនរងគ្រោះទេ។ ហេតុការណ៍នេះបានកើតឡើងបន្ទាប់ពី កូរ៉េខាងជើងបញ្ជូនទាហានចូលទៅកាន់តំបន់គ្មានកងទ័ព ហើយក៏ត្រូវទាហានខាងត្បូងបាញ់គំរាម និងនាំឲ្យមានការផ្ទុះអាវុធដាក់គ្នាតែម្ដង។ នេះគឺជាការប៉ះទង្គិចគ្នាលើកទីពីរក្នុងរយៈពេលប៉ុន្មានថ្ងៃចុងក្រោយ បន្ទាប់ពីមានការប៉ះទង្គិចគ្នាលើកទីមួយកាលពីថ្ងៃទី១០ ខែតុលាកន្លងទៅ។ (ប្រភព៖ theguardian)

៥. ព្យុះ Hudhud នៅឥណ្ឌា សម្លាប់មនុស្ស ២៤នាក់

ខ្យល់ព្យុះស៊ីក្លូន Hudhud បានបោកបក់លើរដ្ឋ Andhra Pradesh និង Orissa កាលពីដើមសប្ដាហ៍មុន និងបានឆក់យកជីវិតមនុស្ស ២៤នាក់ ចំណែកឯច្រើននាក់ទៀតរងរបួស។ ព្យុះដ៏ខ្លាំងក្លានេះ ក៏បានធ្វើឲ្យខូចខាតផ្ទះសម្បែងច្រើនជាង៦៥០០ខ្នង ផងដែរ៕ (ចុចអានលម្អិត)

៦. ការប្រគំតន្ត្រី KPOP នៅកូរ៉េខាងត្បូង រងសោកនាដកម្ម ស្លាប់អ្នកគាំទ្រយ៉ាងច្រើន

(១៧ ១០ ២០១៤) កាលពីថ្ងៃសុក្រកន្លងទៅ មនុស្សចំនួន១៦នាក់បានស្លាប់ និង៩នាក់ទៀតរងរបួសធ្ងន់ ក្នុងហេតុការណ៍បាក់រនាំងដែក អំឡុងពេលប្រគំតន្ត្រី “The 1st Pangyo Techno Valley Festival”។ ក្រោយហេតុការណ៍កើតឡើងមួយយប់ អ្នករៀបចំកម្មវិធីនេះ បានធ្វើអត្តឃាតដោយលោតពីលើអគារកម្ពស់ ១០ជាន់ ព្រោះសោកស្ដាយចំពោះសោកនាដកម្មដែលកើតឡើង។ (ចុចអានលម្អិត)

ព្រឹត្តិការណ៍អន្តរជាតិសំខាន់ៗអ្វីខ្លះកើតឡើងសប្ដាហ៍មុន?៖ ចុចអាន

ដោយ៖ គង់ វិសាល