តើព្រះចន្ទពេញវង់ ប៉ះពាល់ដល់ដំណេកអ្នកដែរឬទេ?

2017-07-14 07:20:35
ចំនួនមតិ 0 | ចំនួនចែករំលែក 0

ចន្លោះមិនឃើញ

មានកត្តាជាច្រើនដែលរំខានដល់ដំណេកអ្នក រួមមាន ឆ្កែព្រុស ក្មេងយំ សម្ពាធការងារ និងសំឡេងរំខានពីឧបករណ៍អេឡិចត្រូនិកនានា ហើយមតិខ្លះលើកថាព្រះចន្ទពេញវង់ ដែលតែងមាន ១ ដង ក្នុង ១ ខែ នោះក៏អាចមានផលប៉ះពាល់ដល់ដំណេកផងដែរ។ តើពិតទេ ព្រះចន្ទពេញវង់ដែលគ្មានសំឡេងអ្វីសោះ អាចមានផលប៉ះពាល់ដល់ដំណេក?

តាមការសិក្សាស្រាវជ្រាវលើកុមារប្រទេសដាណឺម៉ាកចំនួន ៦៧៥ នាក់ ចន្លោះអាយុពី ៨ ឆ្នាំ ដល់ ១១ ឆ្នាំ បានរកឃើញថាពួកគេដេកបានយូរខុសពីធម្មតាពេលព្រះចន្ទពេញវង់។ ប៉ុន្តែការសិក្សាស្រាវជ្រាវដែលលើយុវវ័យចំនួន ៣១៩ នាក់ បានរកឃើញថា ពួកគេដេកបានតិចពេលព្រះចន្ទពេញវង់។

គម្រោងស្រាវជ្រាវផ្សេងមួយទៀតឈ្មោះថា Cajochen នៅឆ្នាំ ២០១៣ បានសិក្សាលើយុវវ័យចំនួន ៣៣ នាក់ រយៈពេល ៣ ឆ្នាំ បានបង្ហាញថា ព្រះចន្ទពេញវង់មានជាប់ទាក់ទងនឹងរយៈពេលវែងទើបដេកលក់ និងកាត់បន្ថយប្រសិទ្ធភាពនៃការដេកលក់របស់យុវវ័យ។ ការសន្និដ្ឋានជាមូលដ្ឋានបង្ហាញថា មុនពេលបង្កើតពន្លឺសិប្បនិម្មិត (អំពូលភ្លើង) មនុស្សមានព្រះចន្ទជាអ្នកបំភ្លឺនៅពេលយប់ ហើយរស់នៅ និងដេកខាងក្រៅរងឥទ្ធិពលពីព្រះចន្ទពេញវង់ដែលរំខានដល់ដំណេក។

សម្មតិកម្មនេះគួរឲ្យចាប់អារម្មណ៍ ប៉ុន្តែមិនទាន់មានការពន្យល់ពេញលេញលើរឿងនេះនោះទេ។ ការសិក្សារបស់ Cajochen បានធ្វើឡើងក្នុងបន្ទប់ពិសោធន៍ មិនមែនក្នុងបរិស្ថានពិតៗនោះទេ ខណៈសិក្សាមានការពន្យល់មិនទាន់ច្បាស់ តើវដ្ដនៃព្រះចន្ទមានឥទ្ធិពលលើការគេងដោយរបៀបណា?

ព្រះចន្ទពេញវង់ គឺកើតមកពីពេល ព្រះអាទិត្យ ផែនដី និងព្រះចន្ទ រត់នៅលើបន្ទាត់ស្របតែមួយ និងមានផែនដីនៅកណ្ដាល ហើយហេតុការណ៍នេះកើតឡើងរៀងរាល់ ២៩ ថ្ងៃម្ដង និងពេលព្រះចន្ទពេញវង់ គឺមេឃមានពន្លឺខ្លាំងខុសធម្មតានៅពេលយប់៕

ទទួលបានព័ត៌មានថ្មីៗ គន្លឹះមានប្រយោជន៍រួមទាំងចំណេះដឹងផ្សេងៗពីបច្ចេកវិទ្យា កុំភ្លេចចុច Like Page Sabay News Technology...

ចុចអានបន្ត ៖

ប្រភព៖ electronics.howstuffworks ប្រែសម្រួល ៖ ប៊ុន ធឿន