តាមពិត Drone និងQuadcopter ត្រូវបានបង្កើតឡើងតាំងពីមុនសង្គ្រាមលោក
- 2017-08-01 03:34:46
- ចំនួនមតិ 0 | ចំនួនចែករំលែក 0
តាមពិត Drone និងQuadcopter ត្រូវបានបង្កើតឡើងតាំងពីមុនសង្គ្រាមលោក
ចន្លោះមិនឃើញ
Drone ឬយើងនិយមហៅថាយន្តហោះគ្មានមនុស្សបើក បានបង្កើតឡើងក្នុងគោលដៅជួយមនុស្សប្រើប្រាស់មធ្យោបាយថ្មី នៃការបង្ហោះឧបករណ៍ទំនើបទៅលើអាកាស ដោយមានសមត្ថភាពពិសេសរួមមានការលេងហ្គេមតាមបច្ចេកវិទ្យា AI និងអនុញ្ញាតឲ្យអ្នកប្រើប្រាស់អាចផ្ដិតយករូបភាពពីលើអាកាសបានយ៉ាងអស្ចារ្យ។
ទៀតសោត Drone ក៏មានសមត្ថភាពខ្ពស់ជាងមនុស្ស ដែលវាអាចហោះចូលទៅកាន់កន្លែងមានគ្រោះថ្នាក់ដែលមនុស្សមិនអាចចូលទៅបាន ហើយ Drone អាចធ្វើការបានយ៉ាងរលូន។ តើអ្នកធ្លាប់ដឹងច្បាស់ពីដើមកំណើត និងការវិវត្តនៃ Drone ដែរឬទេ?
ដំបូងឡើយមានត្រឹមតែឈ្មោះ Drone មួយគត់ ដោយវាជាឧបករណ៍ UAVs (Unmanned Aerial Vehicle) ដែលត្រូវបានគេស្គាល់ថាជាឧបករណ៍ហោះលើអាកាសគ្មានមនុស្សបើក។ ត្រូវបានបញ្ចូលដោយប្រព័ន្ធ Software-Controlled ដោយវាដំណើរការជាមួយប្រព័ន្ធ GPS ក្នុងការត្រួសត្រាយផ្លូវ និងកំណត់នូវការបម្លាស់ទីរបស់វា។
Quadcopter ជាឈ្មោះក្រោយមួយទៀតនៃប្រភេទឧបករណ៍ UAVs។ ជាប្រភេទឧបករណ៍ដែលមានស្លាបចក្រ ៤ ដែលមាន ២ វិលតាមទ្រនិចនាឡិកា និង ២ ទៀតវិលបញ្ច្រាសទ្រនិចនាឡិកា ដើម្បីជំរុញឲ្យឧបករណ៍នោះអាចហោះបាន ហើយវាត្រូវបានវិវត្តដោយមានតេឡេបញ្ជាពីចម្ងាយថែមទៀតផង។
ដូចដែលបានបញ្ជាក់ខាងលើដូច្នោះដែរ UAVs ជាប្រភេទឧបករណ៍ដែលសំដៅទៅលើ Drone និង Quadcopter នោះឯង គ្រាន់ថាវាមានការអភិវឌ្ឍបញ្ចូលនូវបច្ចេកវិទ្យាទំនើបច្រើននាពេលបច្ចុប្បន្ន។ ចុះវាបង្កើតនៅឆ្នាំណា? ហេតុអ្វីគេបង្កើតវាឡើង?
Drone ដំបូងឡើយត្រូវបានប្រើប្រាស់សម្រាប់តែកងទ័ពប៉ុណ្ណោះ។ កងទ័ពអូទ្រីសបានបង្កើតឧបករណ៍នេះឡើងក្នុងគោលបំណងសម្រាប់ប្រើប្រាស់ក្នុងការធ្វើសង្គ្រាម។ អូទ្រីសបានវាយប្រហារទីក្រុងវ៉េនីសនៅឆ្នាំ ១៨៤៩ ជាមួយប៉េងប៉ោងខ្យល់គ្មានមនុស្សបើក ដែលពោរពេញទៅដោយសារជាតិផ្ទុះ។ ប៉ុន្តែក្រោយៗមកបច្ចេកវិទ្យាប្រភេទនេះក៏ត្រូវបានគេយកទៅប្រើប្រាស់ទាំងក្នុងសង្គ្រាមលោកលើកទី ១ និងទី ២ ក៏ដូចជាសង្គ្រាមត្រជាក់ ដែលចាប់ផ្ដើមឡើងនៅអំឡុងឆ្នាំ ១៩៤៧។
ចំណែកឯឧបករណ៍ Quadcopter ដំបូងបង្អស់មានឈ្មោះថា Omnichen 2 បង្កើតឡើងដោយអ្នកវិស្វករ Etienne Omnichen នាឆ្នាំ ១៩២០។ ការសាកល្បងទទួលបានកំណត់ត្រាដោយហោះបានចម្ងាយ ៣៦០ ម៉ែត្រ ធ្វើបានជោគជ័យ ១០០ ដង។ ក្រោយមកចូលជំនាន់ទី ២ នាឆ្នាំ ១៩៥៦ មានឈ្មោះថា Convertawings Model A បង្កើតឡើងដោយលោក George E.Bothezat ។
ចូលមកទល់បច្ចុប្បន្ន រយៈកាល ១០ ឆ្នាំចុងក្រោយនេះ Drone បានទទួលភាពជោគជ័យលើទីផ្សារយ៉ាងពេញទំហឹង ខណៈមានក្រុមហ៊ុនធំៗជាច្រើនដូចជា Heli-Max, Balde, Walker, Parrot និង DJI បានចាប់ផ្ដើមបង្កើតនូវ Mini Drone (ខ្នាតតូច) ដែលមានបញ្ចូលនូវបច្ចេកវិទ្យាពិសេសជាច្រើន បន្ថែមនឹងដៃបញ្ជាដ៏ទំនើប។
ឧបករណ៍ទាំងពីរខាងលើសុទ្ធសឹងតែមានអត្ថប្រយោជន៍ខ្ពស់ ដែលក្រៅពីហោះហើរដោយគ្មានមនុស្សបើក វាក៏មានលក្ខណៈពិសេសផ្សេងទៀតដូចជា:
+ផ្នែកបច្ចេកវិទ្យា:
អាចគាំទ្រការប្រើប្រាស់បច្ចេកវិទ្យា GPS, មុខងារទប់លំនឹងស្ថិរភាពកាមេរ៉ា, គាំទ្រប្រព័ន្ធ WiFi ដែលជាមុខងារងាយស្រួល សម្របនឹងការប្រើប្រាស់ដើម្បីបំពេញតម្រូវការផ្សេងៗ។
+អត្ថប្រយោជន៍នៃស្លាបចក្រទាំង ៤:
ខណៈដែលវាមានស្លាបចក្រ ៤ នោះក៏បានជំរុញឲ្យភាពបត់បែន និងលំនឹងហោះហើរ មានភាពរស់រវើក រហូតដល់គេប្រើប្រាស់ក្នុងគោលដៅពិសេសទាំងក្នុងផ្នែកយោធា និងច្បាប់។ សម្រាប់ការតាមដានបទល្មើសផ្សេងៗ ជាមួយនឹងការដឹកជញ្ជូនសម្ភារៈសំខាន់ទៅដល់កងយោធា។
+ប្រព័ន្ធសុវត្ថិភាព:
ប្រព័ន្ធបច្ចេកវិទ្យាពិសេសដែលបានផ្ទុកក្នុងឧបករណ៍មួយនេះ បានផ្លាស់ប្ដូរឲ្យវាក្លាយទៅជារបស់របរលេងមួយសម្រាប់កូនក្មេងបានផងដែរ។ ដោយគេបង្កើតវាឡើង អាចហោះបានយ៉ាងសុវត្ថិភាពទាំងក្នុងផ្ទះនិងក្រៅផ្ទះ រហូតដល់សូម្បីតែអ្នកកាសែត ក៏បានប្រើប្រាស់ដើម្បីផ្ដិតយកហេតុការណ៍ និងរូបភាពពីលើអាកាស។ មិនតែប៉ុណ្ណោះទាំងការថតភាពយន្តខ្នាតធំនៃក្រុមហ៊ុនផលិតរឿងហូលីវូដ ក៏ចាំបាច់ត្រូវការប្រើប្រាស់វាផងដែរ ដោយជំនួសពីការប្រើឧទ្ធម្ភាគចក្រមានមនុស្សបើក ដែលត្រូវចំណាយលុយច្រើន៕
ទទួលបានព័ត៌មានថ្មីៗ គន្លឹះមានប្រយោជន៍រួមទាំងចំណេះដឹងផ្សេងៗពីបច្ចេកវិទ្យា កុំភ្លេចចុច Like Page Sabay News Technology...
ចុចអានបន្ត ៖