របររកឃ្មុំលក់ របស់កសិករភូមិខ្នារខេត្តតាកែវ បានកម្រៃខ្ពស់ តែប្រឈមគ្រោះថ្នាក់ខ្លាំង
- 2017-05-28 03:39:36
- ចំនួនមតិ 0 | ចំនួនចែករំលែក 0
របររកឃ្មុំលក់ របស់កសិករភូមិខ្នារខេត្តតាកែវ បានកម្រៃខ្ពស់ តែប្រឈមគ្រោះថ្នាក់ខ្លាំង
ចន្លោះមិនឃើញ
ក្រៅពីការងារស្រែចំការកសិករក្នុងភូមិខ្នារឃុំលាយស្រុកត្រាំកក់បូ ខេត្តតាកែវ នាំគ្នាចាប់យករបររកឃ្មុំតាមបែបធម្មជាតិនៅតាមព្រៃចំការ និងព្រៃដែលមានដើមឈើតូចធំចាប់តាំងពីក្នុងមូលដ្ឋានរបស់ពួកគេរហូតដល់ខេត្តកំពត ព្រោះតែមុខរបរនេះ មិនចំណាយដើមទុនអ្វីច្រើនទេ ហើយកម្រៃទទួលបានវិញក៏ខ្ពស់គួសមដែរ។
កសិករអាយុ ៤៥ឆ្នាំ លោក មិន ផៃ មានទីលំនៅភូមិឃុំខាងលើ បានប្រាប់ Sabay ថា៖ ក្នុង១ថ្ងៃអាចរកឃ្មុំបាន៥ ទៅ ៦ផ្លិត ដោយក្នុង ១ផ្លិតអាចលក់បានចាប់ពី២៥ ០០០៛ទៅ៣០ ០០០៛ ដែរ តាមប្រភេទធំ រឺតូច សរុបទៅអាចរកបានជាងដប់ម៉ឺនរៀលដែរក្នុង១ថ្ងៃៗ។
បុរសវ័យកណ្តាលរូបនេះបន្តថា ដោយសារតែចំនួនអ្នករកមុខរបរនេះកាន់តែច្រើនធ្វើអោយការរកឃ្មុំនៅទីជិតៗកាន់តែមានការលំបាកដូច្នោះជារៀងរាល់ថ្ងៃលោកត្រូវចេញដំណើរពីផ្ទះចំងាយប្រមាណជាង ៦០គីឡូម៉ែត្រ រហូតដល់ស្រុកឈូកខេត្តកំពតឯណោះ ដើម្បីស្វែងរកសំបុកឃ្មុំថ្មីៗ។
ដោយធ្វើដំណើរជាក្រុមចាប់ពីម៉ោង ៧ព្រឹក រហូតដល់ម៉ោង១ ទៅម៉ោង២រសៀល បានឃ្មុំពី៥ទៅ៦ផ្លិតទើបត្រលប់មកដល់ផ្ទះវិញយកឃ្មុំទៅលក់នៅតាមផ្សារតាកែវ រឺផ្សាត្រាំកក់ជាដើម ឬជួនកាលលក់តាមផ្លូវអស់ក៏មាន។
"ព្រៃសំបូរដោយដើមប្រេងខ្យល់រាប់សិបហិកតារឺហៅថាព្រៃលើ កាលពីមុនសំបូរឃ្មុំគួរសមតែបច្ចុប្បន្ននេះរកឃ្មុំលែងសូវបានហើយដូច្នោះត្រូវដើឆ្ងាយបន្តិចជួនកាលខ្ញុំទៅដល់ស្រុកជុំគីរី ខេត្តកំពតឯណោះទើបអាចរកបានព្រោះទីនោះមិនសូវមានអ្នករករបរនេះទេហើយឃ្មុំក៏ធំៗដែរ”។ លោកផៃ និយាយ។ លោកបន្តថា៖ ”ត្បិតតែមុខរបរនេះអាចរកប្រាក់បានមែនតែក៏ជួបការលំបាកច្រើនដែរដោយខ្ញុំត្រូវធ្វើដំណើរឆ្ងាយៗហើយពេលខ្លះត្រូវឡើងយកឃ្មុំលើដើមត្នោតរឺដើមឈើខ្ពស់ៗអាចប្រឈមនឹងគ្រោះថ្នាក់ជាយថាហេតុចេះតែទ្រាំធ្វើទៅព្រោះអាចសម្រាលបន្ទុកគ្រួសារបាន១អន្លើៗដែរ”។
លោក ចាន់ ញឹប អនុប្រធានសមាគមអភិវឌ្ឍន៏សហគមន៏ព្រៃឈើព្រៃលើបញ្ជាក់ថា ការរកឃ្មុំនេះជារបរប្រពៃណីរបស់កសិករក្នុងភូមិខាងលើច្រើនទសវត្សមកហើយដែលសព្វថ្ងៃមានកសិករប្រមាណ៣០ ភាគរយកំពុងរកទទួលទានលើមុខររបរនេះបន្ថែមលើការធ្វើស្រែចំការ៕