បុគ្គលបច្ចេកវិទ្យា ១២ រូបខំជម្នះបង្កើតរឿងអស្ចារ្យមិនធ្លាប់មាននៅកម្ពុជា

2018-03-26 03:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្បិតថាមកទល់ពេលនេះ លេចចេញស្នាដៃថ្មីៗរបស់យុវជនក្នុងស្រុកក៏ពិតមែន តែបើក្រឡេកទៅមើលសមិទ្ធផលដំបូងៗរបស់បុគ្គលបច្ចេកវិទ្យាទាំងនេះ សុខចិត្តលះបង់ពេលវេលា កម្លាំងកាយចិត្តព្រមទាំងថវិកាផ្ទាល់ខ្លួន ចំណាយពេលស្រាវជ្រាវតាំងពីនៅមិនទាន់មាននរណាចាប់អារម្មណ៍សោះ រហូតបានផ្លែផ្កាថែមទទួលការគោរពនិងកោតសរសើរពីពលរដ្ឋនិងមជ្ឈដ្ឋាននានា ពិតជារឿងមិនងាយស្រួលប៉ុន្មានទេ។

Sabay ណែនាំប្រិយមិត្តស្គាល់ពីយុវជននិងកូនខ្មែរឆ្នើមៗទាំងជើងចាស់-ថ្មីទាំង ១២ រូបដូចខាងក្រោម៖

#១) ទី រ៉ាឌី ស្ថាបនិកវិបសាយទិញលក់អនឡាញដំបូងគេ Khmer24

ប្រិយមិត្តប្រាកដជាស្គាល់ច្បាស់វិបសាយ Khmer 24 ដែលអាចឲ្យអ្នកទិញ ឬដាក់លក់ផលិតផលទំនិញសព្វសារពើលើអនឡាញ ចាប់ពីគ្រឿងប្រើប្រាស់ទូទៅ រហូតដល់គ្រឿងសម្ភារៈទំនើប។

មុននឹងជោគជ័យក្លាយជាវិបសាយទិញលក់អនឡាញដ៏ល្បីល្បាញនេះ ស្ថាបនិកលោក ទី រ៉ាឌី តស៊ូខំបង្កើតឡើងតាំងពីឆ្នាំ ២០០២ ដោយគ្មានក្រុមការងារសូម្បីម្នាក់ ហើយក៏បានបរាជ័យលើការងារនេះច្រើនដងមកហើយ ប៉ុន្តែមកទល់ពេលនេះឆ្នាំ ២០១៧ ក្លាយជាវិបសាយឈានមុខគេ ខាងលក់ដូរទំនិញ ជាពិសេសគឺផ្ទះនិងរថយន្ត។ ក្នុងមួយខែមានអ្នកទិញ និងលក់ទំនិញរហូតជាង កន្លះលាននាក់ ខណៈនៅខែទី១ ក្រោយពេលបង្កើតអ្នកចូលប្រមាណតែជាង ៥០ នាក់ប៉ុណ្ណោះ។

#២) បេ ចន្រ្តា ស្ថាបនិករៀបចំព្រឹត្តិការណ៍បារខែមដំបូងគេនៅកម្ពុជា

ជាស្ថាបនិកដ៏សំខាន់ក្នុងការរៀបចំព្រឹត្តិការណ៍បារខែមដំបូងគេនៅកម្ពុជាតាំងពីឆ្នាំ ២០០៨។ លោកបានខិតខំបង្កើតកម្មវិធីនេះទាំងបាតដៃទទេ មានក្រុមការងារតែប៉ុន្មាននាក់ប៉ុណ្ណោះ ដែលផ្តោតលើការវិវឌ្ឍន៍នៃវិស័យបច្ចេកវិទ្យា មានវាគ្មិនជំនាញៗនឹងលើកយកចំណេះដឹងនិងរបកគំហើញថ្មីៗ ចែករំលែកដល់អ្នកចូលរួមឲ្យបានយល់ដឹងពីបច្ចេកវិទ្យា ជាពិសេសយុវវ័យដែលចង់ចាប់ជំនាញផ្នែកបច្ចេកទេស។

បេ ចន្រ្តា ទទួលបានការឧបត្ថម្ភពី Smart ជំរុញវិស័យបច្ចេកវិទ្យានៅកម្ពុជា

#៣) អៀ អ៊ុយ អ្នកផលិតហ្គេមខ្មែរដាក់លើទូរសព្ទដៃ Asva the Monkey

ជាអ្នកផ្ដួចផ្ដើមបង្កើតក្រុម Osja Studio ហើយក៏ជាអ្នកអភិវឌ្ឍន៍អាជីវកម្មផលិតហ្គេមដំបូងនៅកម្ពុជា។ លោកបានបង្កើតហ្គេមជាច្រើន មានហ្គេមមួយចំនួនរបស់លោកទទួលស្គាល់នៅលើឆាកអន្តរជាតិដូចជាហ្គេម Asva The Monkey ទទួលបានរង្វាន់ស្នាដៃលើកទឹកចិត្តយ៉ាងសន្ធឹក។

ថ្មីៗនេះ ក្រុមលោកបានបញ្ចេញស្នាដៃបង្កើតបច្ចេកវិទ្យា AR ដាក់លើក្រដាសប្រាក់រៀលខ្មែរដែលជាផ្នែកមួួយនៃបច្ចេកវិទ្យានាពេលអនាគត សូម្បីតែបច្ចុប្បន្នមានក្រុមហ៊ុនផលិតស្មាតហ្វូនល្បី ក៏បានពាំនាំបច្ចេកវិទ្យានេះមកដាក់លើផលិតផលរបស់ខ្លួនដែរ។

អៀ អ៊ុយ តំណាងឲ្យកម្ពុជាដណ្ដើមមេដាយមាសផ្អើលសមាជិកអាស៊ាន

#៤) ញាន ផល្លឹក បង្កើតរថយន្តអង្គរដំណើរការដោយថាមពលពន្លឺព្រះអាទិត្យ

រថយន្តអង្គរជារថយន្តខ្មែរដ៏ល្បីល្បាញដែលជាគំនិតច្នៃប្រឌិតដ៏អស្ចារ្យរបស់ស្ថាបនិកលោក ញាន ផល្លឹក។ រថយន្តអង្គរមិនត្រឹមទទួលស្គាល់ពីពលរដ្ឋក្នុងស្រុក តែក៏ទទួលបានការកោតសរសើររហូតដល់បណ្ដាញផ្សព្វផ្សាយធំៗនៅបរទេសបានចុះមកផ្សព្វផ្សាយយ៉ាងព្រោងព្រាត។

ញាន ផល្លឹកបង្កើតរថយន្តប្រើថាមពលពន្លឺព្រះអាទិត្យ អនាគតនាំចេញទៅក្រៅប្រទេស

#៥) ដាញ់ ហុង ស្ថាបនិកបង្កើតប្រព័ន្ធអក្សរខ្មែរយូនីកូដ

ជាអ្នកក្រោមអ្នកត្រួសត្រាយផ្លូវឲ្យមានប្រព័ន្ធអក្សរខ្មែរយូនីកូដមកប្រើសម្រាប់វាយអត្ថបទនៅលើកុំព្យូទ័រ និងអ៊ីនធឺណិតឲ្យកាន់តែងាយស្រួលជាង ប្រព័ន្ធលីមូន(Limon) ដែលបានរួមចំណែកយ៉ាងសំខាន់ក្នុងការលើកស្ទួយអក្សរសាស្ត្រខ្មែរខ្ពស់មុខខ្ពស់មាត់ និងទទួលបានការគាំទ្រយ៉ាងខ្លាំងក្លាពីពលរដ្ឋកម្ពុជានិងជាតិសាសន៍ដទៃផងដែរ។

ដាញ់ ហុង ធ្លាប់រងអតិថិជនស្តីបន្ទោស ដោយសារភាពស្មុគស្មាញអក្សរសាស្រ្តខ្មែរ

#៦) គ្រុយ វណ្ណា ស្ថាបនិកក្ដារចុចឆ្លាតវៃ

នៅពាក់កណ្ដាលឆ្នាំ ២០១៤ លោកបានបង្កើតក្ដារចុចសម្រាប់ iOS មានឈ្មោះថា khmer Smart Keyboard ជាមួយនឹងក្រុមការងារ Alien Dev។ ត្បិតតែក្ដារចុចនេះ មិនមែនជាការរកឃើញដំបូងគេនៅកម្ពុជា តែដោយសារភាពរលូន និងការច្នៃប្រឌិតថ្មីនៅលើក្ដារចុចខ្មែរ ធ្វើឲ្យស្នាដៃដំបូងរបស់លោកទទួលបានការគាំទ្រយ៉ាងខ្លាំង។

ទោះជាយ៉ាងនេះក្ដីមកដល់ឆ្នាំ ២០១៧ ក្រុមលោកក៏បានបែកខ្ញែកគ្នា នៅសល់តែស្នាដៃប៉ុណ្ណោះសម្រាប់ទុកឲ្យ Developer ជំនាន់ក្រោយៗបន្តកិច្ចការ បង្កើតអ្វីថ្មីទៀតនៅលើក្ដារចុចនេះ។

មុនបង្កើត Khmer Smart Keyboard គ្រុយ វណ្ណា ឆ្លងកាត់រឿងរ៉ាវបែបណាខ្លះ?

#៧) ជា ឡង់ដា BookmeBusកក់សំបុត្រឡានតាមអនឡាញលើទូរសព្ទដៃដំបូងគេ

ជាអតីតនិស្សិតជំនាញវិទ្យាសាស្ត្រកុំព្យូទ័រ បានក្លាយជាអ្នកជំនួញជោគជ័យទាំងវ័យក្មេង តាមរយៈការបង្កើតកម្មវិធីកក់សំបុត្ររថយន្តតាមអនឡាញដំបូងគេ រហូតទទួលបានជយលាភីលេខ ១ ពានរង្វាន់ Cambodia ICT Award ប្រចាំឆ្នាំ ២០១៦។

អតីតនិស្សិត IT ក្លាយជាអ្នកជំនួញជោគជ័យទាំងវ័យក្មេង

#៨) មាស ស៊ីណាល់ បង្កើតវេបសាយកក់បន្ទប់សណ្ឋាគារអនឡាញដំបូងគេ Bayonia

ដោយឃើញថាយុវវ័យភាគច្រើនពិបាកស្វែងរកព័ត៌មានពីកន្លែងស្នាក់នៅពេលចង់ដើរលេងនៅកន្លែងស្អាតៗជុំវិញប្រទេសកម្ពុជាដូចជា ខេត្តសៀមរាប ព្រះសីហនុ កំពត ឬតាមបណ្ដាខេត្តនានា។

លោកក៏បានបោះបង់ការងារជាអ្នកអភិវឌ្ឍកម្មវិធីវិបសាយ(Web Developer) នៅក្នុងក្រុមហ៊ុនមួយកន្លែង មកចាប់ផ្ដើមបង្កើតវិបសាយកក់សណ្ឋគារតាមអនឡាញ Bayonia ដែលជាវេបសាយក្នុងស្រុកដំបូងគេ។ ក្រោយពីឆ្លងកាត់ឧបសគ្គរាប់មិនអស់ ឥឡូវសេវាកម្មកក់អនឡាញនេះទទួលបានការគាំទ្រយ៉ាងខ្លាំង មានទាំងបរទសផងដែរ ស្ញើចសរសើរពីសេវាកម្មថាល្អមិនចាញ់វិបសាយបរទេសដូចជា Booking.com ជាដើម។

យុវជនខ្មែរអង្គរម្នាក់ ប្រឹងបង្កើតកម្មវិធីតាំងពីគេមិនចង់មើលមុខ រហូតចេញរូបរាង

#៩) 4KhmeriPhone ក្រុមស្នើដាក់បញ្ចូលពុម្ពអក្សរខ្មែរលើប្រព័ន្ធ iOS ដំបូងគេ

សមាជិកក្រុម 4KhmeriPhone

រាល់ពេលក្រុមការងារទាក់ទងទៅ 4Khmeriphone បានត្រឹមឆ្លើយឆ្លងតាមទូរសព្ទនិងបណ្ដាញសង្គមប៉ុណ្ណោះ ពួកគេមិនដែលបង្ហាញខ្លួនឲ្យអ្នកប្រើប្រាស់ នៅកម្ពុជាបានឃើញមុខឡើយ។ ទោះយ៉ាងនេះក្ដី 4KhmeriPhone ជាក្រុមត្រួសត្រាយស្នើដាក់បញ្ចូលពុម្ពអក្សរខ្មែរលើប្រព័ន្ធ iOS ដំបូងគេ ដើម្បីឲ្យអ្នកប្រើអាចវាយអក្សរខ្មែរនៅលើខបករណ៌ iOS បានរលូន។

ឆ្នាំ ២០១៦ ក្រុមនេះបានសហការជាមួយក្រុមហ៊ុនជំនាញពុម្ពអក្សរខាងលើ ដោះស្រាយបញ្ហាអក្សរខ្មែរបាត់ដៃបាត់ជើង រហូតជោគជ័យ ១០០ ភាគរយលើ iOS 10 Beta 5 ហើយប្រើស្រួលដល់សព្វថ្ងៃ។

ដោយការមមាញឹកនឹងការងារក៏ដូចជារបរចិញ្ចឹមជីវិតរបស់សមាជិកក្រុម ក៏សម្រចថាមិនបន្តការងារនេះទៀតដោយទុកឲ្យអ្នកជំនាន់ក្រោយបន្តការងារនេះតទៅទៀត។ ចំណែកស្នាដៃរបស់ក្រុមចុងក្រោយបង្កើតបានក្ដារចុចផ្សេងៗនៅលើ App Store ដូចជា Khmer eKeybord ជាដើម។

អ្នកត្រួសត្រាយនាំអក្សរខ្មែរដាក់លើ iOS សុំត្រឹមអក្សរជាតិ...

#១០) ក្រុមអ្នករចនាពុម្ពអក្សរខ្មែរ

អ្នករចនាពុម្ពអក្សរទាំងអស់ក្នុងក្រុមសុទ្ធតែពុំរៀន IT ដោយអ្នកខ្លះរៀនខាង សេដ្ឋកិច្ច អក្សរសាស្ត្រអង់គ្លេស និងជំនាញផ្សេងៗជាដើម។ តែដោយមានឆន្ទៈស្រឡាញ់ការរចនាពុម្ពទើប ប្រឹងប្រែងដល់សព្វថ្ងៃ។ អ្នកខ្លះត្រូវឆ្លៀតពេលទំនេរពីរៀន មករចនាពុម្ពអក្សរថ្មីៗ ឯខ្លះទៀតឆ្លៀតធ្វើនៅចង្ក្រានបាយក៏មាន។

ក្រុមអ្នករចនាពុម្ពអក្សរខ្មែរ បានចំណាយពេលប្រហែល ៣ ឆ្នាំ រចនាពុម្ពអក្សរបានដល់ទៅជាង ៣០០ ម៉ូដ តែគ្មានការលើកទឹកចិត្តពីស្ថាប័នដែលយកពុម្ពអក្សរទៅប្រើឡើយ។ មកទល់ពេលនេះពួកគេបានបែកខ្ញែកគ្នាអស់ហើយ នៅសល់តែពុម្ពអក្សរតាមម៉ូឌដែលពួកគេបានបង្កើតឡើង។

ប្រឹង ៣ ឆ្នាំ រចនាពុម្ពអក្សរខ្មែរជាង ៣០០ ម៉ូដ បែរគ្មានការលើកទឹកចិត្ត

#១១) ខេង វ៉ាន់ថា ស្ថាបនិកបង្កើតវចនានុក្រមខ្មែរដំបូងគេលើទូរសព្ទ

លោកបានបង្កើតវចនានុក្រមអង់គ្លេស-ខ្មែរ, ខ្មែរ-អង់គ្លេស និងខ្មែរ-ខ្មែរ ដំបូងគេសម្រាប់ប្រើប្រាស់នៅលើស៊េរីទូរសព្ទ Symbian របស់ក្រុមហ៊ុន Nokia និងការបង្កើតវចនានុក្រមសម្រាប់ប្រើនៅលើ Window Mobile បន្ថែម Keyboard និងហ្វុងអក្សរខ្មែរ សម្រាប់អានឬមើលនៅលើទូរសព្ទ។

លោកក៏បានបង្កើតវចនានុក្រមមួយទៀតគឺវចនានុក្រមភូមិ សម្រាប់ប្រើនៅលើទូរសព្ទមួយចំនួន ដែលដំណើរការណ៍ដោយ Android។

#១២) ប្លុង ម៉ាលីពណ៌ បង្កើតកម្មវិធីមើលចំណតរថយន្តក្រុងសាធារណៈ

សាស្ត្រាចារ្យផ្នែកវិទ្យាសាស្ត្រកុំព្យូទ័រកញ្ញា ប្លុង ម៉ាលីពណ៌ ដែលជាអ្នកអភិវឌ្ឍន៍កម្មវិធី Stop Near Me ឬកម្មវិធីចំណតក្បែរខ្ញុំដំបូងគេក្នុងប្រទេសកម្ពុជា ដែលជាកម្មវិធីថ្មីមួយសម្រាប់ជួយដោះស្រាយបញ្ហាការពិបាកស្វែងរកចំណតឡានក្រុងធ្វើដំណើររបស់ពលរដ្ឋ។

សាស្ត្រាចារ្យវ័យក្មេងរូបនេះបានប្រឹងប្រែង និងឆ្លៀតពេលទំនេរពីការបង្រៀនមកបង្កើតកម្មវិធីនេះឡើង ប៉ុន្តែមកទល់ពេលនេះនៅមិនទាន់ទទួលបានការគាំទ្រច្រើននោះទេ។